Álihan Smaiylov ǵasyr jasaǵan UOS ardagerin Jeńis kúnimen quttyqtady, dep habarlaidy "Ult aqparat" Úkimettiń baspasóz qyzmetine silteme jasap.
Soltústik Qazaqstan oblysyna jumys saparymen barǵan QR Premer-Ministri Álihan Smaiylov jaqynda 100 jasqa tolǵan mereitoiyn atap ótken Uly Otan soǵysynyń ardageri Valentina Volkodavpen kezdesip, ony aldaǵy Jeńis kúni merekesimen quttyqtady.
«Siz – aty ańyzǵa ainalǵan jeńimpazdardyń birisiz. Tabandylyq, qaisarlyq pen ór rýhtyń arqasynda Siz adamzattyń baǵa jetpes qundylyǵy – erkindikti qorǵap qaldyńyz. Búginde qazaqstandyqtar beibit aspan astynda eńbek etip, jetistikterine qýanyp, bolashaǵyna zor senimmen qarai alady. Munyń bárine Uly Jeńis qaharmandarynyń, sonyń ishinde Sizdiń arqańyzda qol jetkizildi», — dedi Álihan Smaiylov.
Premer-Ministr bizdiń mindetimiz – óskeleń urpaqty joǵary patriottyq qundylyqtarǵa tárbieleý ekenin atap ótti.
«Sizdi quttyqtai otyryp, Uly Otan soǵysynyń barlyq batyryna qurmet kórsetemin. Zor densaýlyq pen sarqylmas kúsh-qýat tileimin! Sizdiń ónegeli ómir jolyńyz ben ǵibratty ǵumyryńyz jastarymyzǵa úlgi bolsyn», — dep túiindedi Úkimet basshysy.
Aita ketsek, Valentina Volkodav 1922 jyly 22 naýryzda dúniege kelgen. 1941 jylǵy 1 qazanda Qyzyl ásker qataryna shaqyrylyp, 1945 jylǵy 20 qazanda jaýyngerlik jolyn aiaqtady. 1-shi Belarýs jáne 1-shi Ýkraina maidandarynda serjant ataǵynda qyzmet etti.
Valentina Arhipovna — 2-dárejeli Otan soǵysy ordeniniń, «Varshavany azat etkeni úshin», «Berlindi alǵany úshin», «Eńbek ardageri» jáne basqa da medaldardyń iegeri. 1962 jyldan bastap Tselinogradtaǵy keramika zaýytynda býhgalter bolyp jumys istedi, al 1992 jyldan bastap Petropavlda turady. Zeinetkerdiń tórt nemeresi jáne úsh shóberesi bar.
