Foto: primeminister.kz
Almaty oblysyna jumys saparymen barǵan QR Premer-Ministri Álihan Smaiylov turǵyn úi qurylysy, infraqurylym jáne ónerkásipti damytý barysymen tanysyp, «Jylý ortalyǵy» jylýmen jabdyqtaý kásipornynyń jumysyn tekserdi, dep habarlaidy "Ult aqparat" primeminister.kz saityna silteme jasap.
Úkimet basshysyna jalpy uzyndyǵy 66 km Úlken Almaty ainalma avtomobil jolyn (ÚAAAJ) salý jónindegi jobany iske asyrý týraly baiandaldy. Búgingi tańda negizgi jer jumystary júrgizilip, barlyq kópirler men jolaiyryqtar salyndy. Sonymen qatar avtojoldy abattandyrý jáne jolaqysyn alýdyń intellektýaldy júiesin iske qosý, kólik quraldaryn dinamikalyq ólsheý jumystary jalǵasýda.
Premer-Ministr avtomagistral óńirdiń ekonomikalyq damýyna aitarlyqtai áser etip, investitsiialyq jáne týristik áleýetin arttyratynyn atap ótti. ÚAAAJ Qytai men Eýropa arasyndaǵy tranzittik tasymal kólemin ulǵaitýǵa, Almatydaǵy kólik qozǵalysyn jeńildetýge múmkindik beredi, iaǵni qala ekologiiasyna da oń áserin tigizedi.
«Bul – memlekettik-jekemenshik áriptestik qaǵidaty boiynsha elimizde júzege asyrylyp jatqan óte mańyzdy, alǵashqy investitsiialyq jobalardyń biri. Ol óńirdiń ekonomikalyq damýyna tyń serpin berip, jol qozǵalysynyń qaýipsizdigin arttyrady. Ákimdik ÚAAAJ-ǵa deiingi radialdy joldardy tez aiaqtaýy kerek. Úkimet óz tarapynan qajetti kómek kórsetedi», — dedi Álihan Smaiylov.
Sondai-aq Premer-Ministr Gate City seriktes qalasyndaǵy «Qoianqus» turǵyn aýdanynda jalpy alańy 290 myń sharshy metrden asatyn 70 kóppáterli turǵyn úidiń qurylysymen tanysty. Jumystardy 2024 jyldyń sońyna qarai aiaqtaý josparlanǵan.
G4 City-di damytý tujyrymdamasyna sáikes integratsiialanǵan qala tórt aýdannan turady: Gate – iskerlik jáne qarjy ortalyǵy, Golden – bilim berý jáne meditsinalyq habtar, Growing – ónerkásiptik jáne logistikalyq habtar, Green – týristik klaster. Qazirgi ýaqytta Gate City aýmaǵynda magistraldyq injenerlik jeliler júrgizilip, «Qoianqus» turǵyn aýdanynyń qurylysy bastaldy.
«G4 City jańa Jibek jolynyń boiynda ornalasqan ekonomikalyq jáne týristik ortalyqqa ainalady dep oilaimyz. Oblys ákimdigi jobanyń áleýmettik baǵytyna, eń aldymen qaladaǵy turmys sapasyna barynsha kóńil bólýi qajet», — dedi ol.
Sonymen qatar Qonaev qalasynda Úkimet basshysy 2020 jyly gazǵa aýystyrylǵan «Jylý ortalyǵy» jylýmen jabdyqtaý uiymynyń jumysymen tanysty. Qazirgi ýaqytta ol shamamen 179,72 Gkal/saǵ óndiredi jáne 30 myńǵa jýyq abonentti, biýdjettik uiymdardy jáne basqa da obektilerdi jylý energiiasymen qamtamasyz etedi.
Álihan Smaiylov jylýmen jabdyqtaý kózderin gazǵa aýystyrý onyń energiia tiimdiligin arttyrýǵa jáne atmosferaǵa shyǵarylatyn ziiandy zattar qaldyqtaryn edáýir tómendetýge múmkindik bergenin atap ótti.
«Qonaev qalasyna oblys ortalyǵy mártebesin berý onyń damýyna aitarlyqtai serpin berip, qalaǵa kóship kelýshi halyqtyń sanyn kóbeitti. Soǵan sáikes óńirde jylý energiiasyn tutynýǵa suranystyń ósýin eskere otyryp, ákimdik jylý kózderiniń qýatyn arttyrý máselelerin pysyqtaýy qajet», — dedi ol.
Sonymen qatar Premer-Ministr «Knaýf Gips Qapshaǵai» JShS-ǵa bardy. Kásiporyn 2003 jyly jeke investitsiialar esebinen salyndy jáne gipsten jasalǵan buiymdar, qurǵaq qurylys qospalaryn, sondai-aq myryshtalǵan profilder shyǵarady.
Qazirgi ýaqytta óndiris 100% qýattylyqpen jumys isteýde. Zaýyt ónimderi ishki naryqqa jáne taiaý shetelderge: Aýǵanstan, Qyrǵyzstan, Resei, Tájikstan, Túrikmenstan jáne Ózbekstan elderine jetkiziledi. 2022 jyly jalpy óndiris kóleminiń 30%-dan astamy eksportqa jiberildi.
Álihan Smaiylov Úkimet qurylys indýstriiasynda joǵary tehnologiialyq kásiporyndar qurýdy belsendi qoldaitynyn, bul importty almastyrý kólemin ulǵaitýǵa múmkindik beretinin atap ótti.
«Sheteldik investitsiialardy tarta otyryp, mundai jobalardy iske asyrý investorlardy qoldaý baǵytynda memlekettiń senimdi kórsetkishi bolyp tabylady. Oblys ákimdigi jańa indýstriialyq jobalardy iske qosý úshin qolaily jaǵdai jasaýdy odan ári jalǵastyrýy tiis», — dedi ol.
