Kórnekti memleket jáne qoǵam qairatkeri, Alash-Orda avtonomiialy úkimetiniń tóraǵasy, Alty Alashtyń rýhani kósemi Álihan Bókeihannyń elge beimálim taǵy bir sýreti tabyldy. Bul fotoqujat Resei mýzeileriniń Goskatalog saitynda jariialanǵan.
Habardy belgili ǵalym, alashtanýshy, jýrnalist Sultan Han Aqquly óziniń áleýmettik jelidegi paraqshasynda bólisti.
"Súiinshi, Alash azamattary! Alty Alash kósemi Álihan Bókeihannyń taǵy bir jańa fotosýreti tabyldy. Bul joly da tarihi fotoqujatty áriptesimiz, taiaýda da ǵana Alash taqyrybyn zerttep, nasihattaýǵa qosqan úlesi úshin "Qazaq Respýblikasyna 100 jyl" tósbelgisimen (medalimen) marapattalǵan izdenimpaz jýrnalist Serikbol Hasan qazbalap júrip taýyp alypty. Serikbolǵa Alash arýaqtary atynan Alash qairatkerleriniń sózimen Táńiri jarylqasyn aitamyn!Al endi sýrettiń ózine kelsek, fotoqujatta Omby qalasynda shyǵa bastaǵan eń alǵashqy beiresmi táýelsiz "Stepnoi krai" gazetiniń ujymy beinelenipti: úshinshi qatarda soldan ońǵa qarai tórtinshi turǵan jas Álihannyń beinesi kózge ottai basylady. Eger Álihannyń "Stepnoi krai" gazetinde Sankt-Peterbor oqýy men "Tobyl ekspeditsiiasynan keiin Ombyǵa oralǵan 1895-dan 1897 jylǵa deiin qyzmet istegenin eskersek, bul fotosýret sol kezeń aralyǵynda túsirilgen bolsa kerek. Álihan ol kezde 29-31 jasta bolatyn" - dep jazdy ol Facebook-taǵy paraqshasynda.
