Sybailas jemqorlyqqa qarsy is-qimyl agenttiginiń tóraǵasy Alik Shpekbaev Qostanai oblysyna sapary aiasynda Rýdnyi qalasynyń jurtshylyǵymen kezdesti, dep habarlaidy "Ult aqparat" vedomstvonyń baspasóz qyzmetine silteme jasap.
Alik Shpekbaev sybailas jemqorlyqqa qarsy zańnamadaǵy ózgerister týraly sóz qozǵap, elde júrgizilip jatqan jemqorlyqqa qarsy saiasat jáne qabyldanyp jatqan aldyn alý sharalary týraly egjei-tegjeili baiandady. Agenttik tóraǵasy basshylardyń qaramaǵyndaǵy qyzmetkerleriniń sybailas jemqorlyǵy úshin jaýap beretinin eske saldy. Aita keteiik, osy jyldyń qyrkúiek aiynda Rýdnyi qalasynyń ákimi B.Ǵaiazov Qashar kentiniń ákiminiń jemqorlyq qylmysy úshin qyzmetinen bosatylǵan edi.
«Qazirgi tańda sybailas jemqorlyqqa qarsy zańnama ár basshyǵa joǵary talaptar qoiyp otyr. Sizder tutas memlekettik organnyń jumysy tazalyq pen parasattylyqqa baǵyttalýǵa bailanysty ekenin jete túsinýlerińiz qajet. Sondyqtan basshylardyń jemqorlyqqa jol ashatyn kez kelgen jaǵdaidy joiý boiynsha belsendi áreket jasaýy mańyzdy. Bul úshin barlyq quraldar bar. Eń bastysy – shynaiy niettiń bolýy», - dedi Sybailas jemqorlyqqa qarsy qyzmet basshysy.
Sybailas jemqorlyqqa qarsy is-qimyl vedomstvosynyń basshysy azamattarmen syndarly dialogty keńeitý qajettiligine, jergilikti atqarýshy organdardyń azamattar úshin qolaily jaǵdai jasaý jumysyn kúsheitý men qoǵamdyq baqylaýǵa nazar aýdardy.
Qoǵamdyq uiymdar ókilderine arnaǵan sózinde Alik Shpekbaev memlekettik organdardyń jumysyn transformatsiialaýda azamattardyń róli artyp kele jatqanyn atap ótti.
Alik Shpekbaev HQKO týraly aita kele, elektrondyq memlekettik qyzmet kórsetýdiń údemeli damýyn atap ótti.
«Qaǵaz júzinde kórsetiletin qyzmetter – ótken kúnniń belgisi. Sheneýnikpen bailanys ornatý arqyly qyzmet kórsetý turmystyq sybailas jemqorlyq qaýpin arttyrady. HQKO-lardyń sanyn kóbeitýdiń qajeti joq. Azamattardy elektrondyq múmkindiktermen jumys isteý daǵdylaryna úiretýge jáne ákimdikterdiń front-keńselerin sapaly pysyqtaýǵa nazar aýdarý qajet», - dedi ol.
