Qazaqstan Prezidenti Qasym-Jomart Toqaev joǵary áskeri jáne arnaýly ataqtar, synyptyq shender berý rásimine qatysty, dep habarlaidy "Ult aqparat" Aqordaǵa silteme jasap.
Memleket basshysy rásimge qatysýshylardy Otan qorǵaýshylar kúnimen jáne Uly jeńis meiramymen quttyqtap, áskeri qyzmetshiler men arnaýly memlekettik organdar qyzmetkerleriniń Qazaqstan Respýblikasynyń qaýipsizdigin qamtamasyz etý isine qosqan úlesin erekshe atap ótti.
– Batyr babalarymyz amanat etip qaldyrǵan keń baitaq jerimizdi qorǵaý – bárimizge ortaq paryz. Sizder siiaqty erjúrek erlerimiz Otanymyzdyń tynyshtyǵyn kúzetip turǵanda elimizdiń bolashaǵy árqashan jarqyn bolaryna men kámil senemin, – dedi Qasym-Jomart Toqaev.
Qazaqstan Prezidenti memleketimizdiń ishki jáne syrtqy saiasi júiesiniń berik negizi retinde qaýipsizdikti qamtamasyz etý máselesine Tuńǵysh Prezident – Elbasy Nursultan Nazarbaevtyń árqashan airyqsha mán bergenin atap ótti.
– Egemendikti, Qazaqstan Respýblikasy aýmaǵynyń tutastyǵy men ulttyq múddeni qorǵaý – bizdiń armiiamyzdyń jáne Kúshtik qurylymdardyń basty baǵdary. Bul strategiialyq mańyzdy mindetterdi sheshý úshin komandirler korpýsyna – generaldar men ofitserlerge zor jaýapkershilik júkteledi. Ásker men quqyq qorǵaý organdaryndaǵy ahýal men áskeri daǵdynyń sapasy sizderdiń saýatty basshylyqtaryńyzǵa bailanysty. Sizderdiń barlyq kúsh-jigerlerińiz, bilimderińiz ben tájiribelerińiz Qarýly Kúshterimizdiń jaýyngerlik qabiletin, quqyqtyq tártip pen konstitýtsiialyq qurylysty qorǵaý jónindegi quqyq qorǵaý organdary men arnaýly qyzmettiń tiimdi jumysyn arttyrýǵa baǵyttalýy tiis, – dedi Qazaqstan Prezidenti.
Qasym-Jomart Toqaev generaldar men ofitserlerge arnaǵan sózinde bul joǵary shender men arnaýly ataqtar olardyń eńbekteriniń laiyqty jemisi ekenin atap ótti.
– Bul Sizderdiń tek kásibi jáne jeke sińirgen eńbekterińizdiń elenýi ǵana emes, sondai-aq, odan da aýqymdy mindetterdi sheshýge múmkindik beretin jaýapkershiliktiń jańa deńgeiin bildiredi. Qýatty ári órkendegen Qazaqstandy qurý jolynda barlyq kúsh-jigerlerińizdi jumsaityndaryńyzǵa senimdimin, – dedi Memleket basshysy.
Rásim barysynda 2-synypty memlekettik ádilet keńesshisi sheni – Ǵ.Nurdáýletovke, M. Ahmetjanovqa; politsiia general-leitenanty arnaýly ataǵy – A.Shpekbaevqa, E. Turǵymbaevqa; general-leitenant áskeri ataǵy – M.Altynbaevqa; Memlekettik kúzet qyzmetiniń general-maiory arnaýly ataǵy – Á.Júsipovke; ulttyq qaýipsizdik general-maiory arnaýly ataǵy – D.Erǵojinge, T.Álimjanovqa, M.Irmenovke, A.Tóleýovke, B.Ýáliniiazovqa; syrtqy barlaý general-maiory arnaýly ataǵy – B.Naizabekovke; 3-sanatty joǵary biliktilik synyby Q.Sóntaevqa; general-leitenant áskeri ataǵy – Á.Halyqovqa, general-maior áskeri ataǵy – M.Aimashevke, A.Ashirovke, F.Bádenovke, A.Jumaǵalievke, T.Qaiyrbekovke, T.Muratbaevqa, A.Mustabekovke; kontr-admiral áskeri ataǵy – S.Bekjanovqa; 3-synypty memlekettik ádilet keńesshisi sheni – Q.Jaqypbaevqa, B.Júiriktaevqa, M.Seksembaevqa; politsiia general-maiory arnaýly ataǵy Q.Dálbekovke, A.Dúisembaevqa berildi.
