Sybailas jemqorlyqqa qarsy is-qimyl agenttiginiń tóraǵasy Alik Shpekbaev Qostanai oblysyna jumys sapary barysynda oblys ákimi Arhimed Muhambetovpen birge Rýdnyi jáne Lisakov qalalarynda boldy, dep habarlaidy "Ult aqparat".
Sybailas jemqorlyqqa qarsy vedomstvo basshysy ákimdikterde «bir tereze» qaǵidatymen azamattarǵa servistik jáne kedergisiz qyzmet kórsetýge arnalǵan «Kómek alańy» front-keńseleriniń jumysymen tanysty.
Qazir kez kelgen azamat kabinetterdiń tabaldyryǵynda kezek kútpei-aq front-keńselerge júgine alady. Ákimdikterdiń qyzmetkerleri turǵyn úi-kommýnaldyq sharýashylyq, jer qatynastary, áleýmettik qorǵaý, aýyl sharýashylyǵy jáne basqa da salalar boiynsha keńester beredi.
Elektrondyq qyzmetterdi alý úshin ózine-ózi qyzmet kórsetý buryshtary da qarastyrylǵan.
«Turmystyq sybailas jemqorlyq azamattar úshin qolaily jaǵdai jasalmaǵan jerde taralady. Azamattardyń qajetti zańdy kómek alý úshin memlekettik qyzmetshige syilyq berýine jol joq. Sheneýnikter máseleni sheshý joldaryn taryltyp, keńselerde otyrǵan qyzmetkerlerdiń mańyzyn jasandy túrde asyra kótermeýi tiis. Árbir memlekettik qyzmetshiniń jumys barysynda ustanatyn qaǵidalary – adaldyq, tártip, qoljetimdilik, ashyqtyq pen ádildik. Ákimdikterdiń yńǵaily front-keńselerimen megapolisterdiń ǵana emes, shaǵyn kentterdiń turǵyndaryn da qamtamasyz etý qajet», - dep atap ótti Alik Shpekbaev.
Rýdnyi men Lisakov qalalarynda «Kómek alańy» ashylǵan sátten bastap 12 myńnan astam turǵyn júgingen. Jergilikti biliktiń aitýynsha, jaqyn arada oblystyń halqy tyǵyz ornalasqan barlyq aýyldarynyń ákimdikteri osyndai jumys nysanyna kóshedi.
Sondai-aq, agenttik tóraǵasy jergilikti memlekettik kirister organdaryna baryp, azamattar men kásipkerlerge qyzmet kórsetý zaldarynyń jumysymen tanysty.
Sonymen qatar, Lisakov qalasynda Alik Shpekbaev pen Arhimed Muhambetov kúrdeli jaǵdailardy sheshýge kómek kórsetý týraly ótinish bildirgen azamattardy birlesken qabyldaý ótkizdi.
