Sybailas jemqorlyqqa qarsy is-qimyl agenttiginiń tóraǵasy Alik Shpekbaev ákimdikter janyndaǵy qala qurylysy keńesteri týraly aitty, dep habarlaidy QazAqparat.
«Qurylystyń qarqyndy damýyn eskere otyryp, osy saladaǵy ákimshilik kedergilerdi joiý máselesi erekshe ózekti. Jobalaý kezeńindegi birinshi másele – sulbalyq jobany kórsetilgen ýaqytta kelisý. Alaida, is júzinde ákimdikter janyndaǵy qala qurylysy keńesterinde maquldaý kezinde merzimder saqtalmaidy», – deidi Alik Shpekbaev elordada ótken kásipkerler forýmynda.
Ol biznes úshin eń qymbat nárse – ýaqyt ekenin aitty.
«Ádette rásimderdiń uzaqqa sozylýy men kidirister sybailas jemqorlyq táýekelderine ákep soqtyrady. 2018 jyly atalǵan keńesterde kelisý rásimi zańdy túrde alynyp, bul olardyń taratylyp ketýine negiz boldy. Eger keibir ákimdikter keńesterdi óz betinshe taratsa, beseýi Agenttik usynysymen joiyldy, al Qostanai, Atyraý jáne Aqmola oblystarynda atalǵan keńester óz jumystaryn áli kúnge deiin jalǵastyrýda», - deidi ol.
Sondai-aq, jer qatynastaryndaǵy monitoring barysynda birqatar másele anyqtalǵan.
«Jerge ornalastyrý qyzmetterimen ainalysatyn kásipkerlerden osyndai qyzmetterdi kórsetetin «Azamattarǵa arnalǵan úkimet» memlekettik korporatsiiasynyń is-áreketine kóptegen shaǵym bar. Memlekettik korporatsiia jer kadastryn júrgizý boiynsha monopolist bola otyryp, óz jobalaryn jeke menshik jobalarǵa qaraǵanda tezirek maquldaidy. Bul kásipkerlerge qolaisyz jaǵdai týdyryp, ádil básekelestikti shekteidi», - deidi Alik Shpekbaev.
