Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Alik Shpekbaev memlekettik qyzmetshilerdiń balalaryna toi jasap berýin «dańǵoilyq jármeńkesine» teńedi, dep habarlaidy "Ult aqparat".
«Sán-saltanaty kelisken aýqymdy toilardyń beinebaiany áleýmettik jelide jii jariialanady. Zal ishi tolǵan gúl. Shoý-biznes juldyzdary. 500-600 qonaq. Keiinirek bul toidy óńirdegi bir basqarma basshysynyń qyzyna nemese ulyna jasap bergeni anyqtalady. Jáne bul tutas bir úrdiske ainaldy. Osyndai beinerolikter jelige taraidy jáne jurtshylyqty «Aqshany qaidan aldy?» degen oryndy suraq mazalaidy. Osy jerde taǵy bir mańyzdy másele týyndaidy. Qatardaǵy memlekettik qyzmetshiler de basshylarynan qalmai, merekeni áli jetkenshe dúrkiretip ótkizýge tyrysady. Bul endi dańǵoilyq jármeńkesi emei, nemene», - dep jazdy Alik Shpekbaev áleýmettik jelidegi paraqshasynda.
Onyń aitýynsha, keibir memlekettik qyzmetshiler úshin balalarynyń úilený toiyn nemese óziniń mereitoiyn ulan-asyr toimen atap ótý ádetke ainaldy.
«Tipti janaza rásimin de «laiyqty deńgeide» ótkizýge tyrysatyndar bar», - deidi tóraǵa.
Sonymen birge, Shpekbaev 2015 jyldan beri memlekettik qyzmetshiler arasynda etikalyq tártipti buzý oqiǵalarynyń 40%-ke azaiǵanyn atap ótti. Ol memlekettik qyzmetshilerdi ózgerýge, qarapaiym bolýǵa shaqyrdy.
«Qurmetti memlekettik qyzmetshiler, ózgerý - ýaqyt talaby. Qarapaiym ári kishipeiil bolýymyz kerek!», - dep jazdy ol.
