Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Alik Shpekbaev qajetsiz qujattardy qoldanystan alyp tastaýdy usyndy, dep habarlaidy QazAqparat tilshisi.
Agenttik tóraǵasy «Adam qyzmet úshin» emes, «Qyzmet adam úshin» ustanymymen jumys isteýge shaqyrdy.
«Kóptegen máseleler boiynsha eski sovettik júiege bailanyp otyrmyz, eshkimge keregi joq anyqtamalardy talap etemiz. Aldyńǵy qatarly elderde munyń biri de joq. Máselen, №083, №086 anyqtamalarynyń ne qajeti bar dep oilaǵan jan bar ma? Kóp jaǵdaida bul anyqtamalar sheshimge yqpal etpeidi. Abitýrienttiń kózi nashar kórse de, JOO-ǵa ala beredi. Esesine, dál osy anyqtamalardy jasaityn tutas indýstriia bar. Shyn kerek bolǵan jaǵdaida bul qujattardy elektrondy túrde qaraityn múmkindikter ashý kerek. Basqa qandai qujattardan arylý kerek, barshańyzdy oi qosýǵa shaqyramyn», - dedi ol MQISJQIA alqasynyń keńeitilgen otyrysynda.
Ol elektrondy memlekettik qyzmetterdi damytý - turmystyq sybailas jemqorlyqty jeńýdiń birden-bir joly ekenin eske saldy.
«Sońǵy úsh jylda elektrondy memlekettik qyzmet sany 48% kóbeiip, qaǵaz júzindegi qyzmetter bes esege azaidy. Qyzmet kórsetýdiń yńǵaily jáne qoljetimdi mobildi-tsifrlyq infraqurylymyn jasaý mańyzdy», - deidi agenttik tóraǵasy.
