«QazMunaiGaz» UK» AQ Basqarma tóraǵasy Alik Aidarbaev kompaniia qurylymdaryn ary qarai ońtailandyrýǵa qatysty usynystardy engizdi, dep habarlaidy QazAqparat.
«Biz daǵdarystan keiingi kezeńge daiyndyq jasap jatyrmyz. Kompaniianyń qarjylyq jaǵdaiyn qoldaý úshin jekeshelendirý baǵdarlamalary sekildi birqatar shara qaita qaralady. Sonymen birge «QazMunaiGaz» qurylymdaryn ary qarai ońtailandyrýǵa qatysty usynystar bar. Qurmetti Nursultan Ábishuly! Sizdiń basshylyǵyńyzben táýelsizdik jyldarynan beri munai men gaz boiynsha qýatty kólik infraqurylymy jasaldy. Keńqiiaq-Atyraý sekildi munai qubyrlary salyndy. Atyraý-Samar munai qubyrynyń ótkizý qýaty artty. Qazaqstan – Qytai, Beineý – Shymkent, Saryarqa gaz qubyr jelileri salyndy. Osy infraqurylymnyń bári de qazirgi tańda bizdiń enshiles eki kompaniiaǵa – «QazTransOil» men «QazTransGazǵa» tiesili. Osy eki kompaniianyń «QazMunaiGaz» quramynda bolýy tolyǵymen ózin-ózi aqtady. Resýrstardyń bárin bir ortalyqqa baǵyttaý kerek boldy. Qazirgi ýaqytta osy eki kompaniia qazir ózdiginen jumys isteitin deńgeige jetti», - dedi Alik Aidarbaev Elbasy Nursultan Nazarbaevtyń tóraǵalyǵymen ótken «Samuryq-Qazyna» keńesiniń otyrysynda.
Osyǵan bailanysty Alik Aidarbaev alǵashqy kezeńde «QazTransGaz» kompaniiasyn ǵana «QazMunaiGazǵa» tikelei baǵynyshty kúiinde qaldyrýdy usyndy.
«Bul – birinshiden basqarý deńgeiin qysqartýǵa, ekinshiden «QazMunaiGaz» IRO-ǵa shyqqan jaǵdaida infraqurylymdyq jobalardy memleket menshigine qaldyrýǵa jol ashady. Úshinshiden «QazMunaiGazdyń» ózi munai men gazdy óndirip, óńdei alatyndai barlaý jumysyn kúsheitkeni jón. Shet elderdiń tájiribesi ádette kólik infraqurylymdarynyń jeke jumys júrgizip, memleket menshiginde qalǵany abzal ekenin kórsetip otyr», - dedi ol.
