Armeniianyń premer-ministri Nikol Pashinian men Ázerbaijan basshysy Ilham Áliev Taýly Qarabaqtaǵy jaǵdai boiynsha kelissózder júrgizý úshin Máskeýge kelýge daiyn ekendikterin bildirdi, dep habarlaidy "Ult aqparat" TASS agenttigine silteme jasap.
«Taýly Qarabaq qaqtyǵysy tek beibit jolmen sheshilýi kerek, bul – bizdiń ustanymymyz. Ókinishke orai, Ázerbaijan bul kózqaraspen kelispeidi.
Men osyndai nátijege jetý úshin barýǵa, kezdesýge, sóilesýge bar kúsh-jigerimdi jumsaýǵa daiynmyn», - dedi Armeniianyń premeri TASS agenttigine bergen suhbatynda.
«Eger ekinshi tarap daiyn bolmasa, biz halqymyzdyń, Taýly Qarabaqtaǵy otandastarymyzdyń quqyqtary úshin sońyna deiin kúresýge daiynbyz. Meniń oiymsha, bul – Armeniia úkimetiniń, Armeniia halqynyń, armian diasporasynyń ustanymy, bul – adal jáne syndarly ustanym», - dep jalǵastyrdy sózin Pashinian.
Áliev TASS-qa bergen suhbatynda Baký ókilderiniń Máskeýdegi armian tarapymen kelissózderge daiyn ekenin málimdedi.
«Biz qashan da teke-tiresti toqtatyp, retteý joldaryn tabý úshin Máskeýde jáne qai jerde bolmasyn, kezdesýge daiynbyz», - dedi Áliev.
Sonymen birge Ázerbaijan basshysy Bakýde «kez kelgen bailanysqa daiyn» ekenin aitty.
«Bul jaǵdaida men mundai shaqyrtýdy almadym, sondyqtan bul maǵan qatysty suraq emes. Resei prezidenti Vladimir Pýtinniń ózi birneshe ret jáne onyń aldynda Dmitrii Medvedev Ázerbaijan men Armeniia basshylary arasynda úsh jaqty kezdesýler ótkizdi. Biraq Armeniiadaǵy bilik shartty túrde «Sorostyń» qolyna ótkennen keiin mundai bailanystar toqtady», - dep túsindirdi Áliev.
