Qylmystyq kodekstiń birneshe baby boiynsha sottalǵan biznesmen Qairat Jamaliev aiyppul tólep, túrmeden bosap shyqty, dep habarlaidy "Ult aqparat" tilshisi Aqmola oblystyq sotynyń baspasóz qyzmetine silteme jasap.
Vedomstvonyń málimeti boiynsha, aǵymdaǵy jyldyń 23 mamyrynda Kókshetaý qalalyq sotynda «Álibi Jumaǵulov isi» boiynsha jazasyn ótep jatqan Qairat Jamalievtiń ótinishi qaraldy. Ol jazanyń qalǵan merzimin aiyppulǵa aýystyrýdy suraǵan.
Eske salaiyq, kásipker Jamaliev 2015 jyldyń tamyz aiynda toqaly Ainur Isinany Álibi Jumaǵulovtan qyzǵanyp, jigitti ólimshi etip sabaǵan bolatyn. Sol kezde bul oqiǵa əleýmettik jelige tarap, qyzý talqylanǵan edi. Astana qalalyq sotynyń úkimimen biznesmen QR Qylmystyq kodeksiniń 194-baby (bopsalaý), 126-baby (bas bostandyǵynan eriksiz aiyrý) jáne 121-baby (seksýaldyq sipattaǵy zorlyq-zombylyq áreketter) 13 jylǵa sottaldy.
Keiin kassatsiialyq shaǵym boiynsha jaza merzimi 7 jylǵa qysqartyldy. 2015 jyldan 2018 jylǵa deiin jazasyn Almaty oblysyndaǵy túzetý mekemesinde ótegen. 2018 jyldyń qańtar aiynda Kókshetaýdaǵy qonystaný koloniiasyna aýystyryldy.
Aqmola oblystyq sotynyń baspasóz hatshysy Kúlásh Domalaqova atap ótilgendei, Jamaliev túrmede mádeni-buqaralyq sharalarǵa belsendi qatysyp, ózin-ózi tárbieleýde ózgelerge úlgi kórsetken. Tártibi jaqsy bolǵan. Oǵan qylmystyq atqarý júiesi qyzmetkerleri tarapynan oń minezdeme berilgen. Onymen qosa, onyń ótinishin qaraý kezinde zardap shekken tarap ta qatysqan. Álibi Jangeldin shyǵynnyń ótelýine bailanysty jazany jeńildetýdi suraǵan. Solaisha, biznesmenniń ótinishi prokýror, zardap shegýshi jáne sot tarapynan qoldaý tapty.
«Jamaliev jazasynyń úshten birin ótegen. Osy ýaqytta birde-bir teris minez kórsetpegen. Qylmystyq atqarý júiesi qyzmetkerleri tarapynan tek madaqtama alyp otyrǵan. Ózine júktelgen jumystarǵa jaýapkershilikpen qarady. Oǵan qosa, zardap shekken jaqtyń materialdyq shyǵynyn tolyq ótedi. Sot osynyń barlyǵyn eskere kele, oǵan qalǵan 1434 kún jazasyn 862 myń 193 teńge aiyppulǵa aýystyrdy», - dep túsindirdi Kúlásh Domalaqova.
