25 aqpan kúni Túrkistan oblysynda Qazaqstan Jazýshylar odaǵy basqarmasynyń Tóraǵasy Ulyqbek Esdáýlet jáne oblys ákiminiń orynbasary Málik Otarbaevtyń qatysýymen ziialy qaýym ókilderiniń basqosýy ótti.
Jiynda Jazýshylar odaǵynyń Túrkistan oblystyq filialynyń direktory bolyp belgili aqyn Álibek Shegebai, al Shymkent qalalyq filialynyń direktory qyzmetine jazýshy Shoibek Orynbai taǵaiyndaldy.
Aita ketsek, Álibek Shegebai 1974 jyly 11 naýryzda dúniege kelgen. Ál Farabi atyndaǵy Qazaq Ulttyq ýniversitetiniń "Jýrnalistika" fakýltetiniń túlegi. 1997 jyly M. Áýezovtyń 100 jyldyǵyna orai QazUÝ-da ótken respýblikalyq stýdent jastardyń jyr múshairasynda bas júldeni jeńip alady. Sodan beri de birneshe jyr báigelerinde júldeli oryndardy iemdendi. 1998 jyly Respýblikalyq «Jalyn» jýrnalynda jaryq kórgen óleńder toptamasyna T. Aibergenov atyndaǵy syilyq berildi. 2002 jylǵy Astana qalasynda ótken Halyqaralyq «Shabyt» festivaliniń laýreaty. Shyǵarmashylyqtaǵy jetistikteri úshin 2004 jyly Qazaqstan Jastar odaǵy «Serper» syilyǵynyń laýreaty atandy. 2016 jylǵy Halyqaralyq «Atatúrik» medaliniń iegeri. 2001 jyldan Qazaqstan Jazýshylar odaǵynyń múshesi. Birneshe jyr jinaqtaryna óleńderi engen. «Alakeýim», «Áinekke túsken Ai sáýle», «Aq qaýyrsyn», «Aq jaýyn» atty óleń kitaptarynyń avtory.
Buǵan deiin "Qazaq ádebieti" gazetinde jaýapty hatshy qyzmetin atqardy.
Al, Orynbai Shoibek 1953 jyly 7 mamyrda Ońtústik Qazaqstan oblysy, Saryaǵash aýdany, «Sotsializm» aýylynda dúniege kelgen.
Qazaq memlekettik ýniversitetiniń jýrnalistika fakýltetin bitirgen. Saryaǵash aýdandyq «Qyzyl tý» gazetinde jaýapty hatshy, redaktordyń orynbasary, Kókshetaý, Ońtústik Qazaqstan oblystyq gazetterinde, oblystyq ákimshilikte jaýapty qyzmetter atqarǵan. Biraz ýaqyt respýblikalyq «Egemen Qazaqstan» gazetiniń Ońtústik Qazaqstan oblysyndaǵy menshikti tilshisi, táýelsiz «Ar» gazetiniń Bas redaktory bolǵan. Qazir «Ǵasyr Sh» baspasynyń direktory.
1986 jyly «Jalyn» jýrnaly men Qazaq KSR Ishki ister ministrliginiń birigip jariialaǵan jabyq báigesinde «Qatelik» degen shytyrman hikaiaty úshinshi oryndy, 1995 jyly «Jalyn» baspasy jariialaǵan dástúrli báigesinde «Ámirshiniń álegi» atty povesi bas júldeni ielengen.
Alǵashqy týyndylary «Arman qanatynda», «Saryaǵash sazdary» ujymdyq jinaqtaryna engen. Sodan bergi ýaqytta «Ómir degen osyndai», «Tozańdy tereze», «Sańyraýqulaq», «Ámirshiniń álegi» povesteri men áńgimeleri, «Qaiǵy zaman nemese Tóle bi taǵdyry» roman-dilogiiasy, t.b. jeke kitap bolyp shyqqan.
2003 jyly shyndyq derekterge negizdelgen «Túrmege túspeitinder» atty detektivti romany jaryq kórdi. 1999 jyly oblys ákiminiń «Altyn qaýyrsyn» júldesin, 2001 jyly «Jyldyń úzdik jazýshysy» ataǵyn ielendi.
