31 qazanda partiianyń resmi saity men Primaries.kz portalynda «Nur Otan» filialdarynyń sailaý konferentsiialaryn ótkizý boiynsha nusqaýlyq jariialandy. Bul máslihat sailaýyna partiia tizimin bekitý men Májilistiń negizgi bóligin qalyptastyrýǵa múmkindik beretin praimerizdiń kelesi deńgeii, dep jazdy «Nur Otan» partiiasynyń hatshysy Álibek Áldenei Facebook-te.
«Nusqaýlyqta sailaý konferentsiialaryn ótkizýdiń erejesi men kún tártibi kórsetilgen. Negizgi protsedýralardy túsindirip keteiin.
Birinshi. Aýdandyq jáne qalalyq konferentsiialarda pikirsaiysqa oblystyq máslihat pen Májiliske partiialyq tizimge úmitker tulǵalar qatysady. Bul praimerizde joǵary reiting jiǵan kandidattar.
Pikirsaiysqa qatysýshylar tizimi oblystyq partiialyq tizimge aýdan (qalalyq) ókildiginiń kvotasyndaǵy ár orynǵa 2 kandidat esebimen jasaqtalady. Aitalyq, eger oblystyq partiialyq tizimde aýdanǵa kvota boiynsha 2 oryn qarastyrylsa, onda aýdandyq (qalalyq) konferentsiiadaǵy debatqa 4 adam qatysýy tiis.
Úmitker pikirsaiysqa qatysýdan bas tartqan (jazbasha formatta) jaǵdaida pikirsaiysshylar tizimine praimerizdiń birinshi deńgeiiniń qorytyndysy boiynsha eń kóp daýys jinaǵan kelesi kandidat engiziledi.
Sonymen qatar eger pikirsaiysshylar tiziminde áielder nemese jastar (35 jasqa deiingi) ókilderi bolmasa, onda aýdandyq (qalalyq) Saiasi keńes biýrosy pikirsaiysshylar tizimin kórsetilgen sanattan eń kóp daýys jinaǵan kandidattarmen tolyqtyrýǵa quqyly.
Ekinshi. Pikirsaiys qorytyndylary boiynsha praimeriz kandidattaryna bastaýysh partiia uiymdarynyń jinalystarynda aldyn ala sailanǵan delegat-sailaýshylar daýys beredi.
Delegattar kandidattarǵa «Praimeriz» AJ-inde arnaiy bólmede kompiýtermen nemese noýtbýkpen daýys beredi. Bul qupiia elektrondy reitingtik daýys berý. Bul rette bir mezgilde qalaǵan birneshe kandidatqa daýys berýge bolady.
Endi daýys berý nátijesine kelsek. Nusqaýlyqta «pikirsaiystardyń qorytyndylary boiynsha eń kóp daýys jinaǵan kandidat Májilistiń partiialyq tizimine pikirsaiysqa qatysýshy retinde oblystyq konferentsiiaǵa usynylady. Árbir aýdan(qala) Májilistiń partiialyq tizimine pikirsaiysqa bir qatysýshyny usynady... Osydan keiin oblystyq partiialyq tizimge kandidattar retinde oblystyq partiialyq tizimge aýdan (qala) ókildiginiń kvotasyna sáikes, pikirsaiystardyń qorytyndylary boiynsha eń kóp daýys jinaǵan kandidat usynylady. Bul rette Májilistiń partiialyq tizimine pikirsaiysqa qatysýshylardyń sany oblystyq partiialyq tizimge usynylatyn kandidattar sanyna kiredi» dep jazylǵan.
Bul ne degen sóz? Túsinikti bolý úshin mysal keltireiin. Sonymen aýdandyq (qalalyq konferentsiia) pikirsaiysta birinshi oryn alǵan adam oblystyq konferentsiiadaǵy pikirsaiysqa qatysý quqyna ie bolady jáne oblys atynan Májilistiń partiialyq tizimine ený úshin kúrese alady.
Ekinshi jáne odan tómengi oryndarǵa ie bolǵan pikirsaiysqa qatysýshylar ókildik kvotasy aiasynda oblystyq máslihattyń partiialyq tizimine enedi.
Qalǵan pikirsaiysqa qatysýshylar aýdandyq máslihattyń partiialyq tizimine kiredi.
Úshinshi. Oblystyq konferentsiialar da protsedýralyq turǵyda osylai ótedi. Al qatysýshylarǵa kelsek, mysaly oblysta 19 aimaq bolsa, onda oblystyq konferentsiiadaǵy pikirsaiysqa aýdandyq konferentsiialardyń 19 jeńimpazy men oblys ortalyǵynyń jeńimpazdary (aimaqtyń Májilistegi ókildigi kvotasyna sáikes) qatysady. Olarǵa búgingi tańda osy aimaq atynan ókildik etip otyrǵan, respýblikalyq partiialyq tizimge engisi keletin Májilistiń qazirgi depýtattary da qosyla alady.
Pikirsaiys qorytyndysy boiynsha, aýdandyq (qalalyq) konferentsiialarda sailanǵan ár aimaqtyń delegaty daýys beredi.
Nusqaýlyqta «pikirsaiystardyń qorytyndylary boiynsha eń kóp daýys jinaǵan kandidattar praimeriz qorytyndylary boiynsha óńirden Májiliske partiialyq tizimge qosylý úshin kandidat retinde usynylady. Kandidattar sany Májiliske partiialyq tizimdegi óńir ókildiginiń kvotasyna sáikes aiqyndalady» delingen. Bul degenimiz, mysaly eger sailaýshylar sanyna sáikes, oblys Májilistiń partiialyq tizimine 6 adam usyna alatyn bolsa, onda meiilinshe kóp daýys jinaǵan alǵashqy 6 qatysýshy oblystyq konferentsiianyń jeńimpazdary bolady.
Bul rette Májilistiń qazirgi depýtattarynan bólek oblystyq konferentsiia pikirsaiysyna qatysýshylar men jeńimpazdary bir mezgilde oblystyq partiialyq tizimge engiziledi.
Tórtinshi. Birqatar mańyzdy jaǵdailardy atap óteiin.
Barlyq sharalar koronavirýs pandemiiasy jaǵdaiyndaǵy sanitarlyq-epidemiologiialyq qaýipsizdik normalary saqtala otyryp ótkiziledi. Ashyqtyqty qamtamasyz etý úshin barlyq konferentsiialar, sonyń ishinde pikirsaiystar filialdardyń áleýmettik jelilerdegi resmi akkaýnttarynda tikelei efirde kórsetiledi.
Aýdandyq, qalalyq jáne oblystyq konferentsiialarda delegattardyń daýys berýi arqyly «Nur Otan»-nyń tiisti sailaýaldy baǵdalamasy qaralyp, bekitiledi.
Osylaisha, aýdandyq, qalalyq jáne oblystyq konfrentsiialar ótkizilgennen keiin «Nur Otan»-da barlyq deńgeidegi máslihattar sailaýyna qatysý úshin partiialyq tizimder men aimaqtyq sailaýaldy baǵdarlamalar túbegeili bekitiledi.
Sonymen birge Májiliske partiialyq tizimniń 62% (nemese barlyq 127 kandidattyń 78-i) praimerizdiń jeńimpaz aimaqtary ókilderinen jasaqtalady. Qalǵan 49 kandidatty «Nur Otan»-nyń Saiasi keńes biýrosy usynady. Májiliske usynylatyn sońǵy partiialyq tizim sezde bekitiledi.
Osylaisha, «Nur Otan»-nyń úsh deńgeili praimeriziniń nátijesinde aldaǵy sailaýǵa usyný úshin ashyq báseke negizinde partiia kandidattary tańdalady, -dep atap ótken Álibek Áldenei óz habarlamasynda.
.jpeg)