Búgin QR Parlamenti Senatynyń jalpy otyrysynda Tuńǵysh Prezident-Elbasy Nursultan Nazarbaevqa «Qurmetti Senator» mártebesi berildi.
Parlament Senatynyń depýtaty Áli Bektaevtyń senat otyrysynda sóilegen sózin oqyrman nazaryna usynamyz.
***
Qurmetti Dariǵa Nursultanqyzy!
Qurmetti áriptester!
Biz qarap, talqylap otyrǵan másele jai ǵana aǵymdaǵy másele emes. Búgingi qabyldanatyn sheshim QR Parlamenti Senatynyń qabyrǵasynda qabyldanǵan tarihi jáne mańyzdy sheshimderdiń biri de biregeii bolmaq.
«Qurmetti Senator» mártebesin berý zamanaýi Qazaqstannyń negizin qalaýshy, qos palataly Qazaqstan Parlamentarizminiń negizin salǵan jáne onyń damýyna teńdessiz úles qosqan, elimizdiń birligi men yntymaǵyn qamtamasyz ete otyryp, strategiialyq damý baǵdaryn aiqyndaǵan Qazaqstan Respýblikasynyń Tuńǵysh Prezidenti – Elbasy N.Á. Nazarbaevtyń sińirgen tarihi eńbegin moiyndaýdyń taǵy da bir belgisi bolyp tabylady.
Qazaqstan táýelsizdik alǵan alǵashqy jyldary óte qiyn ótpeli kezeńnen ótti. Qazaqstannyń derbes memleket bolyp ketetinine kúmán keltirgender de az bolǵan joq. Zamanaýi memleket qurýdyń bar aýyrtpashylyǵyn da, jaýapkershiligin de óz moinyna alǵan Nursultan Nazarbaev bolatyn. Sol kezdegi basynan ótken qiyndyqtardy tek Elbasynyń ózi ǵana biledi. Biz bile bermeimiz, biraq sezinemiz.
Qanshama saiasi teketirester, ekonomikalyq qasarystar bolyp jatty. Aiaqtan shalý men kedergiler de az bolǵan joq. Sonyń barlyǵyna tótep bergen de, qiynnan qiystyra jol tapqan da Qazaqstannyń Tuńǵysh Prezidenti edi.
Sondai teketires jaǵdaiynda Qazaqstannyń Konstitýtsiiasy qabyldanyp, eki Palataly Parlamenti quryldy, qanshama zańdar, el ekonomikasyn kóterý jolynda qanshama mańyzdy sheshimder qabyldandy, biik belester baǵyndyryldy.
Basqany aitpaǵanda, Keńester odaǵynan bólingen táýelsiz memlekettter arasynda jalǵyz Qazaqstan ǵana óziniń shekarasyn halyqaralyq deńgeide tolyq zańdastyryp aldy. Orta Aziia elderinen bólek, kórshiles Resei arasyndaǵy 7 800 shaqyrym, Qytai Halyq Respýblikasymen aradaǵy 1 800 shaqyrym shekaranyń bekitilýin qazaq halqy úshin, Táýelsiz Qazaqstan úshin baǵa jetpes tarihi jeńis dep te aitýǵa bolady. Bunyń barlyǵy Elbasynyń úlken erik-jigeri men diplomatiialyq kóregendiginiń, kórshi elder basshylarymen jasaǵan adami qarym-qatynasynyń, dostyq qasietiniń arqasy.
Búginde Nursultan Nazarbaevtyń – bútkil álem moiyndaǵan qairatker ekendigine eshkimniń kúmáni joq. Alpaýyt memleketter basshylarynyń bizdiń Elbasyny, alaqandaryna salyp, tóbesine kóterýi bútkil qazaq halqyna, táýelsiz Qazaqstanǵa kórsetilgen qurmet dep esepteýimiz kerek. Jaqynda ǵana Tuńǵysh Prezidenimizdiń Qytai Halyq Respýblikasynyń tóraǵasy Si Tszipinniń arnaiy shaqyrtýymen baryp, 37 memleket basshylary, 10 000-nan astam delegat qatysqan «Bir beldeý, bir jol» halyqaralyq forýmynyń tórinde otyrǵanyn, Qytai memleketiniń eń joǵarǵy marapaty «Dostyq» ordenine saltanatty túrde ie bolǵanyn kórip bárimiz de marqaiyp, mártebemiz kóterildi.
Túrki keńesi memleketteri kóshbasshylarynyń qabyldaǵan sheshimine sáikes, túrki álemi elderin damytýǵa zor úles qosqany úshin Nursultan Nazarbaevqa Túrki tildes memleketter yntymaqtastyq keńesiniń ǵumyr boiǵy Qurmetti tóraǵasy mártebesi berilgenin de qazaqstandyqtar zor qýanyshpen qabyldady.
Keshe ǵana Eýraziialyq ekonomikalyq odaqqa múshe memleketter basshylarynyń sheshimimen bizdiń Elbasyǵa Eýraziialyq odaq joǵarǵy keńesiniń qurmetti tóraǵasy mártebesiniń berilýi de bizdiń elge, elimizdiń tuńǵysh basshysyna kórsetilgen zor qurmet ekendigine daý joq.
Qurmettep qana qoimai, Nursultan Nazarbaevtyń mol tájiribesin, abyroiy men bedelin, aqyly men keńesin, kóregendigi men kemeńgerligin osy halyqaralyq uiymdar paidalanatyndyǵyn da jasyryp otyrǵan joq.
Osynyń barlyǵy neni kórsetedi? Eń birinshi Qazaqstan Respýblikasynyń álemdik geosaiasattaǵy alǵan mártebeli ornyn kórsetedi.
Bul - bizdiń elimizdiń dárejesi biik, abyroiy joǵary, alpaýyttarmen terezesi teń memleket bolǵandyǵynyń belgisi.
Elin súigen, eli sengen Elbasynyń, álem moiyndaǵan, álem qurmettegen abyzǵa ainalýy bizdiń halqymyzdyń urpaqtan urpaqqa jalǵasyp kele jatqan tektiliginiń, Uly dala urpaqtarynyń ananyń sútimen, atanyń qanymen sińgen erekshe qasietiniń bir kórinisi dep te aitýǵa bolady. Tekti elde ǵana tekti ul týady. Tekti ulyn tóbege kóterip tý etken el ǵana óziniń tektiligin joǵaltpaityny da tarihtan belgili.
Sondyqtan da Qazaqstannyń Tuńǵysh Prezidenti – Elbasy Nursultan Nazarbaevqa bútkil dúniejúzi bas iip, qurmet kórsetip otyrǵanda bizdiń búgingi qabyldaityn sheshimimiz teńizge tamǵan tamshydai ǵana ekendigi anyq. Biraq Elbasyǵa «Qurmetti Senator» mártebesiniń berilýi QR Parlamenti Senatynyń abyroiyn asyryp, bizdiń barlyǵymyzǵa, Senat depýtattaryna qosymsha jaýapkershilik júkteitini daýsyz.
Sondyqtan da QR Prezidenti Qasym-Jomart Kemeluly Toqaevtyń usynysyn tolyq qoldai otyryp, áriptesterimdi de osy sheshimniń jobasyn biraýyzdan qoldaýǵa shaqyramyn.
Rahmet!
Áli Bektaev
2019 jyl, 30 mamyr
