Alǵys aitý kúni – ol qazaq halqyna syi-qurmettiń nyshany. Bul týaly QR Parlament Májilisiniń depýtaty Vakil Nabiev málim etti, dep habarlaidy QazAqparat.
«Kóktemniń alǵashqy kúninde maǵynasy tereń Alǵys aitý kúnin atap ótemiz. Bul merekelik datany Elbasy Nursultan Nazarbaev Qazaqstan halqy Assambleiasy qurylǵan kúndi negizge alyp bastamashylyq etti. Bul turǵyda barsha etnostar bir-birine jáne qazaq halqyna alǵys aitady. Qazaq halqy óziniń meirimdiligimen ózge ult ókilderin jaqynyndai qabyldaǵanyn barlyǵy umytpaidy. Sondyqtan atalǵan mereke Qazaqstan halqy meirimdiliginiń, dostyqtyń ári baýyrmaldyqtyń aiqyn kórinisi. Elge tutas etnostar jer aýdarylǵanyn, olardy vagondardan jazyq dalaǵa túsirip ketkenin bárimiz bilemiz. Al onsyz da qiyn jaǵdaidaǵy qazaq otbasylar sol kezde jer aýdarylǵandardy úilerine kirgizip, barynsha qoldaý jasap keldi. Atalarymyz sol náýbet jyldardaǵy barlyq aýyrtpalyqtardy jii eske alatyn», - dedi V. Nabiev.
Osy oraida depýtat Alǵys aitý kúnin atap ótý maqsattarynyń biri óskeleń urpaqty tózimdilikke, syilastyqqa, sondai-aq eldegi beibitshilik pen kelisimge tárbieleýge baǵyttalǵanyn atap ótti. Sondyqtan bul datanyń tereń maǵynalyq máni bar.
«Alǵys aitý kúni – ol óz elińe, jerińe, qazaq halqyna erekshe qurmettiń belgisi. Osy mereke etnostar basynan ótkergen aýyrtpalyqty, birligimizdi jastarǵa túsindirýge yqpal etedi», - dedi V.Nabiev.
Onyń aitýynsha, Alǵys aitý kúni qarsańynda QHA-nyń «Jańǵyrý joly» jastar qozǵalysy, «Jarasym» uiymy, etnomádeni birlestikter jastary merekelik is-sharalardy ótkizýge belsendi túrde qatysady.
.jpeg)