Foto: videodan skrinshot
Astanada konditer Nurshat Aqbergenova men bloger Aselina Batyr arasyndaǵy sot daýy aiaqtaldy, dep habarlaidy Ult.kz Tengri Life-ke silteme jasap.
Sot sheshimin sýdia Gúlzada Rashkalieva jariialap, talapkerdiń ótinishi ishinara qanaǵattandyrylǵanyn málimdedi.
«Aqbergenovanyń Batyrbekovaǵa qarsy ar-namysty, qadir-qasietti jáne iskerlik bedeldi qorǵaý týraly talap aryzy ishinara qanaǵattandyrylsyn. Instagram men Threads jelilerinde taratylǵan aqparat shyndyqqa sáikes kelmeidi dep tanylsyn», – dedi sýdia.
Astananyń azamattyq ister jónindegi aýdanaralyq soty Aselina Batyrǵa sheshim zańdy kúshine engen kúnnen bastap 10 jumys kúni ishinde Instagram jáne Threads jelilerinde jalǵan aqparatty teriske shyǵaratyn jazba jariialaýdy mindettedi.
Sonymen qatar, sot sheshimimen jaýapkerden:
-
200 myń teńge (jumys aqysy, sot shyǵyndary jáne memlekettik baj);
-
100 myń teńge (moraldyq ótemaqy) óndiriledi.
Talaptyń qalǵan bóligi boiynsha sot qanaǵattandyrýdan bas tartty.
Buǵan qosa, sot Nurshat Aqbergenovadan Aselina Batyrdyń paidasyna 30 myń teńge óndirip alýǵa sheshim qabyldady — bul jaýapkerdiń ókili qyzmetiniń bir bóligin óteý úshin.
Sot taraptardyń hat almasýyn zerttei kele, torttyń dizainy, salmaǵy jáne bezendirilýi talqylanǵanymen, baǵasy aldyn ala naqty kelispegenin anyqtady. Keiin Aqbergenova tortty daiyndaǵan, al Batyr ony ishinara ǵana tólegen.
Materialdarǵa sáikes, torttyń jalpy baǵasy 300 myń teńge bolǵan, onyń bir bóligi tólenip, keiin qaitarylǵan.
Sot sonymen qatar Nurshat Aqbergenovanyń ókili — zań keńesshisi Arjan Sádýaqas tarapynan protsessýaldyq zań buzýshylyqtar anyqtap, bul jóninde Ádilet ministrligi men Zań keńesshileriniń respýblikalyq palatasyna jeke qaýly jiberýge sheshim qabyldady.
Ministrlik bir ai ishinde qabyldanǵan sharalar týraly sotqa habarlaýy tiis. Talap oryndalmaǵan jaǵdaida, ákimshilik jaýapkershilik qarastyrylǵan.
Eske salaiyq, konditer Nurshat Aqbergenova bloger Aselina Batyrdan 18 kelilik tort úshin tólenbegen 500 myń teńgeni, sondai-aq 3 million teńge moraldyq ótemaqyny jáne jeke keshirim suraýdy talap etken.
Blogerdiń qorǵaýshylary óz kezeginde deserttiń baǵasy tym joǵary ekenin aityp, qoǵam tarapynan qysym men kibershabýyldarǵa silteme jasap, sot otyrysyn jabyq ótkizýdi suraǵan edi.
