Áleýmettik jelide ornyqty oidy nasihattaýdyń joldary qandai? Bul suraqqa IX Azamattyq forým jumysynyń taqyryptyq sessiiasynda tanymal bloger Násima Qorǵanbekova jaýap berdi, dep habarlaidy QazAqparat.
«Qarapaiym mysal: áleýmettik jelide otyrǵan kezde adamdarǵa maska taǵýdyń mańyzy týraly jii jazamyz. Muny oqyrmanǵa qalai jetkize bilý kerek? Virýsologtardan sheksiz suhbat alyp, ǵylymi turǵydan maskanyń tiimdi ekenin tynymsyz túsindire berýge bolady. Tipti óz sóziń dáleldi, dáiekti bolý úshin BBC-diń oǵan qatysty zertteýin de bólisip, kórsetýge múmkindik zor. Alaida oily jáne ornyqty túrde osy pikir-paiymdy túsindirip otyrsań, keibir adam durys qabyldamaýy múmkin. Alaida áleýmettik jelidegi jazbańdy «qyzdar, búgin kún shyǵyp tur, maska taǵyp betti qorǵamasaq, betimiz pigmenttelip, terimizge qiyn bolatyn boldy» dep jazyp edik – sol postymyzdyń birine jazylýshylar tarapynan nazar qatty boldy. Osydan keiin maskanyń shynynda da, paidaly ekenin basqa jolmen jetkizýdiń amal-ádisterin oilap tabýǵa týra keledi», - deidi Násima Qorǵanbekova.
Blogerdiń aitýynsha, maska taǵa júrip, densaýlyqqa qaýip tóndirmei, saqtanyp júrýge ábden bolady.
«Máselen dál qazirgi ýaqytta maskany taǵa júrip, sonyń arqasynda tonaldy maidyń kýrtkama jaǵylyp qalmaitynyna kózim jetti. Álbette men bul týraly da jazarmyn. Tek sonda ǵana keibir adam qabyldap, jazǵanyńdy oqyp, aitqanyńa qulaq asady. Kózimniń jetkeni – aqparattyń kóbiniń «as úide qabyldanatyny». As úidegi adamǵa «qaidaǵy bir ushaqtyń virýs taratatady eken» degenin góri «maska betińizdi ýltrakúlgindi sáýle men kúrteńizdi tonaldy maidan qorǵaidy eken» dep jazǵanyn oqyǵan paidaly», - dedi ol.
