Qyzylordada er adam dostarymen birge áleýmettik jeli arqyly tanysqan shymkenttik qyzdy tonap ketti.
20 qarasha kúni saǵat 06:27-de Qyzylorda qalasynyń politsiia basqarmasyna Shymkent turǵyny aryzdanǵan. Aitýynsha, qyzylordalyq jigit onyń úiine kelip, qorqytyp, uialy telefony men aqshasyn tartyp alǵan, dep habarlaidy Sputnik Qazaqstan agenttigi Polisia.kz saityna silteme jasap.
Bul faktige qatysty Qylmystyq kodekstiń 191-baby 2-tarmaǵy 1-tarmaqshasy (Adamdar tobynyń aldyn ala sóz bailasýymen jasalǵan tonaý) boiynsha sotqa deiingi tergeý bastaldy.
Tergeý barysynda jábirlenýshi áleýmettik jelide bir azamatpen tanysyp, ony óz úiine shaqyrǵany anyqtaldy. Shamamen 30 minýttan keiin qyzdyń úiine eki er adam – tanysqan jigiti men onyń dosy kelgen. Artynan taǵy eki er adam kirgen. Tórteýi qosylyp, qyzdy qorqytyp, uialy telefony men aqshasyn tartyp alyp ketken.
Jedel izdestirý sharalary kezinde politsiia qalanyń eki turǵynyn "izin sýytpai" ustady. Olardan zattai aiǵaqtar tárkilendi. Kúdiktiler óz kinásin tolyǵymen moiyndady, qamaýǵa alyndy.
Qazirgi tańda olardyń sybailastary izdestirilýde.
