Qazaqstanda qazan aiynyń sońǵy jeksenbisinde Áleýmettik qorǵaý júiesi qyzmetkerleriniń kúni atalyp ótiledi. Osy kásibi merekege orai búgin Taldyqorǵan qalasyndaǵy Oqýshylar saraiynda oblys ákiminiń orynbasary Jaqsylyq Omar «Áleýmettik qorǵaý júiesiniń úzdik qyzmetkeri» baiqaýynyń júldegerlerin marapattap, sala qyzmetkerlerin quttyqtady.
Saltanatty jiynǵa qatysýshylardy quttyqtap, tilegin bildirgen J. Omar:
- Qurmetti áleýmettik sala qyzmetkerleri! Barshańyzdy oblys basshysynyń atynan kásibi merekelerińizben shyn júrekten quttyqtaimyn! Sizderdiń qarttar men múgedekterge, kóp balaly jáne kúnkórisi tómen otbasylarǵa, jumyssyz azamattarǵa kórsetken qamqorlyqtaryńyz erekshe atap ótýge turarlyq. «Meiirim júrekten shyǵady, peiil tilekten týady» deidi halyq danalyǵy. Osy salada jetken jetistikterdiń barlyǵy – izgilik pen adamgershilikti tý etken eseli eńbekterińizdiń jemisi. Sizderdi merekelerińizben taǵy da quttyqtai otyryp, denderińizge saýlyq, otbasylaryńyzǵa amandyq tileimin, - dedi oblys ákiminiń orynbasary.
Munan soń «Áleýmettik qorǵaý júiesiniń úzdik qyzmetkeri» oblystyq baiqaýynyń qorytyndysy shyǵarylyp, úzdikter marapattaldy. «Memlekettik áleýmettik saqtandyrý qory» AQ oblystyq filialynyń mamany Baýyrjan Qabdrahmanov «Áleýmettik saqtandyrý salasynyń úzdik qyzmetkeri», oblystyq eńbek inspektsiiasy basqarmasynyń bas mamany Raýshan Abdanbaeva «Eńbek inspektsiiasy salasynyń úzdik memlekettik eńbek inspektory», Taldyqorǵan kalasynyń - úi jaǵdaiynda arnaýly áleýmettik qyzmet kórsetý bólimshesiniń áleýmettik qyzmetkeri Uljalǵas Kóketaeva «Úzdik áleýmettik qyzmetker», múmkindigi shekteýli balalarǵa arnalǵan «Úmit» kúndizgi ortalyǵynyń áleýmettik qyzmetkeri Jibek Alkenova «Úzdik áleýmettik qyzmetker», «Báiterek» kúndizgi ortalyǵy «Úzdik meditsinalyq-áleýmettik mekeme» atanyp, 100 myńnan 300 myń teńgege deiingi aqshalai syilyq sertifikattaryna ie boldy. Sonymen qatar jumyspen qamtýdy úilestirý jáne áleýmettik baǵdarlamalar máselesinde jaqsy kórsetkishterge jetken uiymdar da nazardan tys qalǵan joq. Ile jáne Kóksý aýdandyq jumyspen qamtý ortalyqtarynyń árqaisysy 200 000 teńgeniń sertifikatymen marapattaldy.
Halyqty áleýmettik qoldaý máseleleri boiynsha «Áleýmettik jobalardy» iske asyrýda belsendilik tanytqany úshin «Erlik», «Sporttyq saýyqtyrý ortalyǵy» múgedekter qoǵamdyq birlestikteri, «Taldyqorǵan aimaqtyq eńbekke ornalastyrýǵa járdem kórsetý qory» qoǵamdyq qorynyń eńbegi erekshe atalyp, árqaisysyna 100 myń teńgeniń sertifikaty berildi.
Sol siiaqty oblys ákiminiń orynbasary birqatar azamattarǵa «Eńbek Eri» medalin, «Áleýmettik-eńbek salasynyń úzdigi» tósbelgisin, Eńbek jáne halyqty áleýmettik qorǵaý ministrliginiń, oblys ákiminiń qurmet gramotalary men alǵys hattaryn usyndy.
Jalpy búgingi kúni Almaty oblysynda áleýmettik qorǵaý salasynda 3 myńnan astam adam eńbek etedi. Memlekettik baǵdarlamalardy júzege asyrý nátijesinde óńirdegi jumyssyzdyq deńgeii 4,7 %-ke tómendedi. Bul kórsetkishke qol jetkizý úshin 2011 jyldan 2016 jylǵa deiin 126 myńnan astam jumys orny quryldy. «Nátijeli jumyspen qamtý jáne jappai kásipkerlikti damytýdyń 2017-2021 jyldarǵa arnalǵan baǵdarlamasyna» biylǵy jyly oblysta 22 myń adam tartyldy, 8 myńnan astam jumyssyz azamat tegin kásibi bilim alýǵa múmkindik aldy. Sonymen qatar baǵdarlama sheńberinde biylǵy jyldyń ózinde 800-ge tarta adamǵa jalpy somasy 3 mlrd. 563 mln. teńge shaǵyn nesie berildi. Múgedekterge kómek retinde biylǵy jyly 2 mlrd. 900 mln. teńge bólindi.
