Memlekettik áleýmettik saqtandyrý qorynan tólenetin áleýmettik tólemderdiń mólsheri ósti, dep habarlaidy "Ult aqparat" Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
"2022 jyldyń 1 qańtarynan bastap Memlekettik áleýmettik saqtandyrý qorynan (MÁSQ) eńbek etý qabiletinen aiyrylý jáne asyraýshysynan aiyrylý boiynsha áleýmettik tólemder mólsheri 5%-ǵa, 1 sáýirden bastap qosymsha 4%-ǵa ósti. Tólemderdiń jiyntyq mólsheri ótken jyldyń deńgeiimen salystyrǵanda 9%-ǵa artty" - delingen habarlamada.
MÁSQ-nan tólenetin tólemderdi áleýmettik saqtandyrý júiesiniń jumys isteitin qatysýshylary bazalyq memlekettik áleýmettik járdemaqylarǵa qosymsha alady.
"Máselen, MÁSQ-nan eńbek etý qabiletinen aiyrylý boiynsha áleýmettik tólemderdi 81,6 myń adam alady. Eger múgedektigi boiynsha biýdjetten tólenetin járdemaqylardyń ortasha mólsheri 54 608 teńge bolsa, onda MÁSQ tólemderin eskere otyryp, azamattar barlyǵy 84 353 teńge alady.
MÁSQ-nan asyraýshysynan aiyrylý boiynsha áleýmettik tólemderdi 54,2 myń adam alady. Eger asyraýshysynan aiyrylý boiynsha biýdjetten tólenetin járdemaqylardyń ortasha mólsheri 45 627 teńge bolsa, onda MÁSQ tólemderin eskere otyryp, azamattar barlyǵy 76 443 teńge alady" - delingen vedomstvo aqparatynda.
Osylaisha, jumys isteitin azamattarǵa tólenetin tólemderdiń ortasha mólsheri áleýmettik saqtandyrý júiesine qatyspaityn alýshylarǵa tólenetin tólemderge qaraǵanda shamamen 30 myń teńge joǵary.
MÁSQ-nan joǵary mólsherdegi áleýmettik tólemder sáýir jáne mamyr ailaryndaǵy qosymsha aqyny eskere otyryp, osy jyldyń maýsym aiynda aýdarylady.
