Túrkistan oblysynyń ákimi Darhan Satybaldyǵa óńirdegi áleýmettik nysandardaǵy temperatýralyq rejimniń saqtalýy jáne oiyn alańshalarynyń jai-kúii jaily baiandaldy, dep habarlaidy «Ult aqparat» oblys ákimdiginiń baspasóz qyzmetine silteme jasap.
Oblys ákiminiń tapsyrmasyna sáikes óńirdegi áleýmettik nysandardaǵy jylytý maýsymynyń ótýi boiynsha ishinara tekserý júrgizildi. Nátijesinde birqatar kemshilikter anyqtaldy. Oblys basshysy olqylyqtardy retteýge bir apta ýaqyt berdi.
«Áleýmettik nysandardyń jylytý maýsymyna daiyndyǵy qatań baqylaýda bolýy kerek. Árbir mekeme basshysy ózi basshylyq jasaityn mekeme ornalasqan ǵimarattyń sapasyn, qysqa daiyndyǵyn qadaǵalap, kemshilikter bolsa, joiýǵa kúsh salýǵa tiis. Jaýapty basqarmalarǵa ózderine tiesili nysandardy retke keltirýdi tapsyramyn», – dedi oblys ákimi.
Túrkistan qalasy, Sozaq, Sairam, Qazyǵurt, Maqtaaral aýdandaryndaǵy bilim nysandarynyń jylý sapasy boiynsha ishinara olqylyqtar tabylǵan. Sairam, Báidibek aýdanyndaǵy áleýmettik nysandar boiynsha da máseleler bar. Budan bólek, biýdjet esebinen salynǵan balalar jáne sport alańshylarynyń sapasyz qurylysy da apparattyń aptalyq otyrysynda talqylanyp, oblys ákimi jaýapty basqarmalar men aýdan, qala ákimderine jumysty shiratý jóninde tapsyrma berdi.
