Elimizde óńir ákimdikterimen áleýmettik nan baǵasyn 90 teńgeden asyrmaý jóninde memorandým jasalyp jatyr. Bul týraly QR Aýyl sharýashylyǵy ministrligi agrarlyq azyq-túlik naryqtary jáne aýyl sharýashylyǵy ónimin qaita óńdeý departamentiniń direktory Nazgúl Hatepova málim etti, dep habarlaidy QazAqparat.
«Ózderińiz biletindei, nannyń birneshe túri bar. Sonyń ishinde ministrlik áleýmettik nan baǵasyn ǵana baqylai alady. Qazir azyq-túlik korporatsiiasynda bar bidaimen ishki naryqty qamtý sharasy júrip jatyr. Búginde bidai tonnasynyń ortasha baǵasy - 150-160 myń teńge, al korporatsiia baǵany túsirip, tonnasyn 90 myń teńgege satyp jatyr. Osylaisha, óńirlerge arzan baǵamen 36 myń tonna bidaidy jetkizý jumysy bastalyp ketti. Óńir ákimdikterinen bizge kelip túsken ótinishterge sáikes, qańtardan qyrkúiekke deiingi arzan bidaiǵa degen suranys - 275 myń tonna», - dedi Nazgúl Hatepova ortalyq kommýnikatsiialar qyzmeti alańynda bolǵan baspasóz máslihatynda.
Aýyl sharýashylyǵy ministrligi ókiliniń aitýynsha, nan baǵasyn belgilengen mejede ustap turý jergilikti atqarýshy organdarǵa júkteledi.
«Óńir ákimdikteri azyq-túlik túlik korporatsiiasynan bidaidy arzan baǵamen alyp, jergilikti un óndiretin mekemelermen kelisim jasasady. Atalǵan kelisimniń negizinde áleýmettik nannyń baǵasy 90 teńgeden aspaýy tiis. Osy oraida, qazir oblys ákimdikterimen memorandým jasalyp jatyr, iaǵni biz bidaimen qamtamasyz etsek, jergilikti atqarýshy organdar nan baǵasynyń turaqtylyǵyn qamtamasyz etýge jaýapty bolady», - deidi ol.
