«Qazaqstan halqyna» qorynyń qurylýy Áleýmettik meditsinalyq saqtandyrý qorynyń jumysy men qarjylyq jaǵdaiyn jeńildetken joq.
Qordyń meditsinalyq kómek sapasyn monitoringteý departamentiniń direktory Lázzat Shomanova BAQ ókilderiniń saýalyna osylai jaýap berdi, dep habarlaidy QazAqparat tilshisi.
«Qazaqstan halqyna» qorynyń qurylýy bizdiń qarjylyq júktememizge áser etken joq. Ol qordyń maqsaty basqa. Bizde naýqastarǵa kórsetiletin kómekke jumsalatyn qarjynyń bári josparlanǵan. Onyń ústine bizde «Shetelde emdeý sharalaryn uiymdastyrý jónindegi jumys organy» deitin arnaiy organ bar. Sol uiymdastyrýshy organ arqyly bizdiń elde kórsetilýi múmkin emes meditsnalyq kómekti naýqastardyń shetelde alýyna jaǵdai jasaimyz. Arnaiy komissiia bar. Ol komissiiany QR Densaýlyq saqtaý vitse-ministri basqarady. Sol komissiia maquldasa, emdeýge jiberemiz. Iaǵni, «Qazaqstan halqyna» qoryna qatysy joq osyndai kómek túri bar», - dedi ol ortalyq kommýnikatsiialar qyzmetinde.
Mamannyń aitýyna qaraǵanda, qordyń sarapshylary shetelge jiberilgen naýqastyń jaǵdaiyn jiti baqylaýda ustaidy.
«Shetelde emdelýge jibergen kezde 100 paiyz aqysyn aýdara salmaimyz. Basynda 70 paiyzyn aýdarsaq, naýqas elge qaitar kezde sarapshylar sheteldik áriptesteriniń qorytyndysyn qaraidy. Sol qorytyndy boiynsha tolyq em júrgizilgenine kóz jetkizip qana sheteldik uiymǵa qalǵan aqshany aýdaramyz.
Bul kómekke syrqatyn bizde emdeýge kelmeitin, joǵary biliktilikti qajet etetin naýqastar jiberiledi. Kóbinese tinder men aǵazalardyń donoryn qajet etetin naýqastar jiberiledi. Óitkeni bizdiń mentalitet marqumdardyń aǵzasyn donorlyqqa berýdi áli durys túsine bermeidi. Radiatsiialyq emdeý degen bar. Ol boiynsha Belarýs eline jiberemiz, mysaly. Bul kómek ásirese balalarǵa baǵyttalǵanyn aitý kerek», - dedi Lázzat Shomanova.
