QR Qarjy ministrliginiń Memlekettik kirister komiteti elimizde jariialanǵan tótenshe jaǵdaiǵa bailanysty, halyq tutynatyn áleýmettik mańyzy bar importtalatyn azyq-túlikterge «jasyl dáliz» ornatty, dep habarlaidy "Ult aqparat" komitettiń baspasóz qyzmetine silteme jasap.
Bul shara - birinshi kezekte tutynatyn taýarlar defitsitin týdyrmaý úshin jasalýda.
Vedomstvonyń málimdeýinshe, 2019 jyldyń 1 qańtarynan bastap Qazaqstanǵa jalpy quny 554,6 mln AQSh dollary turatyn 872 myń tonna taýar jetkizilgen.
Atap aitqanda, qant – 165 myń tonna ($55,9mln); qus eti – 148 myń tonna ($143 mln); piiaz – 133 myń tonna ($30,5 mln); sút – 118 myń tonna ($56,8 mln); qyryqqabat– 85 myń tonna ($24 mln); 78 myń tonna ($14,6 mln) sábiz siiaqty áleýmettik mańyzy bar azyq-túlik qataryna jatqyzylǵan 19 túrli taýar importtalǵan.
«Qazirgi tańda birinshi qajettilik taýarlaryn tasymaldaityn negizgi kompaniialarǵa keden tekserýi, saraptama, jáne taýardyń qunyn kedendik baqylaý siiaqty sharalar qoldanylmaidy.
Sondai-aq, qazir shekarada ózge sanattaǵy biznes sýbektilerine ákimshilik júktemelerdi azaitý úshin «qyzyl jáne sary dálizderdiń» jumysy qysqartylǵan», delingen habarlamada.
