Tselinograd aýdanyndaǵy «Shapaǵat» arnaiy áleýmettik qyzmet kórsetý ortalyǵynyń direktory men basqa da tulǵalardyń aqshalai qarajatty jymqyrǵandyǵy áshkerelendi, dep habarlaidy QazAqparat.
«Tergeý barysynda anyqtalǵandai, Tselinograd aýdanyndaǵy «Shapaǵat» arnaiy áleýmettik qyzmet kórsetý ortalyǵynyń direktory men basqa da tulǵalary óz qalaýy boiynsha, sondai-aq ortalyqtyń qyzmet alýshylaryn habardar etpei jáne kelisiminsiz notarialdyq senimhattardy paidalana otyryp, olardyń aqshalai qarajatyna bilik etken. Sonymen qatar, tergeý bul mekemege 2019-2021 jyldar aralyǵynda jalaqy jáne basqa tólemder túrinde aqsha berilgen jáne aýdarylǵan is júzinde jumys istemegen tulǵalar resmi túrde jumysqa ornalasqandyǵyn anyqtady. Biýdjet qarajatyn urlaýdan keltirilgen zalal kólemi 17 million teńgeden asty. Qylmystyq is sotta qaralýda», - dedi Aqmola oblysy boiynsha Sybailas jemqorlyqqa qarsy is-qimyl departamentiniń baspasóz qyzmetinen.
Vedomstvodan atap ótkendei, quqyq buzýshylyqtardyń qaitalanýyna jol bermeý maqsatynda Sybailas jemqorlyqqa qarsy is-qimyl departamenti qylmystyq is sheńberinde sybailas jemqorlyqqa qarsy monitoring júrgizdi, onyń usynymdary sybailas jemqorlyqtyń sebepteri men jaǵdailaryn joiý boiynsha pármendi sharalar qabyldaý týraly usynysqa engizildi (QPK-niń 200-babynyń tártibimen).
Atap aitqanda, usynysta basshylardyń óz qaramaǵyndaǵy qyzmetkerleri qyzmetine tiisti baqylaýdy, áleýmettik sala qyzmetkerleriniń sybailas jemqorlyqqa qarsy zańnamany múltiksiz saqtaýyn, sondai-aq memlekettik qyzmetterdi kórsetýdiń jáne mekemelerdiń qarjy-sharýashylyq qyzmetiniń ashyqtyǵy men aiqyndyǵyn qamtamasyz etý qajettiligi kórsetilgen.
Sonymen qatar óńirlik Sybailas jemqorlyqqa qarsy qyzmeti men Jumyspen qamtýdy úilestirý jáne áleýmettik baǵdarlamalar basqarmasynyń basshylyǵy sybailas jemqorlyqtyń aldyn alý máselelerin talqylaý boiynsha kezdesý ótkizdi.
Kezdesý barysynda oblystyq Antikor basshysy Arman Rahimov atap ótkendei, tergeý áleýmettik qorǵaý salasynda kemshilikter oryn alǵanyn kórsetti. Halyqtyń áleýmettik osal toptaryn qorǵaý boiynsha qajetti sharalar qabyldaýǵa tiis josyqsyz laýazymdy tulǵalar, kerisinshe, odan paida tabady. Mundai sheneýnikter, sondai-aq olardyń basshylary mindetti túrde qatań jaýapkershilikke tartylatyn bolady.
