Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine áleýmettik kásipkerlikti damytý máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat .
Zań jobasy Qazaqstan Respýblikasynda áleýmettik kásipkerlikti damytý tetikterin zańnamalyq turǵydan retteý jáne júieleý maqsatynda ázirlendi. Qujat azamattardyń áleýmettik osal sanattaryn jumyspen qamtýdy qamtamasyz etýge járdemdesýge jáne olar úshin qoǵamdyq paidaly qyzmetke qatysýǵa basqa azamattarmen teń múmkindikter jasaýǵa, áleýmettik kásipkerlik sýbektileri, onyń ishinde azamattardyń áleýmettik osal sanattarynyń jeke eńbekke qatysýy arqyly óndiretin taýarlardy naryqqa jyljytýǵa, sondai-aq áleýmettik mindetterdi sheshýge yqpal etetin áleýmettik innovatsiialardy engizýdi qamtamasyz etýge baǵyttalǵan.
Zań jobasynda sondai-aq áleýmettik kásipkerliktiń uǵymdary men negizgi mindetterin bekitý, qandai da bir uiymdy áleýmettik kásipkerlik sýbektilerine jáne áleýmettik kásipkerlik sýbektileriniń qyzmeti baǵyttalǵan halyq sanattaryna jatqyzý ólshemsharttaryn aiqyndaý kózdeledi.
Jumys tobynyń zań jobasymen jumys isteý barysynda depýtattar:
-áleýmettik kásipkerlik sýbektileri qyzmetiniń baǵyttaryn keńeitýge;
-áleýmettik kásipkerlik sýbektileriniń tizilimin kásipkerlik jónindegi ýákiletti organnyń internet-resýrsynda ornalastyrýǵa jáne osy tizilimde qamtylýǵa tiis málimetter tizbesin aiqyndaýǵa;
-áleýmettik kásipkerlik sýbektileriniń tizilimin qalyptastyratyn arnaiy óńirlik komissiianyń quramyna memlekettik organdardyń, Ulttyq kásipkerler palatasynyń jáne qoǵamdyq birlestikterdiń ókilderin engizýge;
-áleýmettik kásipkerlik sýbektileri sanattarynyń ataýlaryn naqtylaýǵa baǵyttalǵan túzetýler engizdi.
Budan basqa, depýtattar Qazaqstan Respýblikasynyń qoldanystaǵy zańnamasyna jáne zań tehnikasynyń talaptaryna sáikes keltirý jóninde, sondai-aq zań jobasynyń jekelegen normalaryn naqtylaityn jáne mazmunyn jaqsartatyn túzetýler engizdi.
Osy zań jobasy 2021 jylǵy 28 sáýirde birinshi oqylymda maquldandy.
