Eńbek resýrstaryn damytý ortalyǵy saitynda test rejiminde elimizdiń áleýmettik-eńbek salasynyń negizgi kórsetkishteri beriletin dashbord (aqparattyq panel) iske qosyldy, dep habarlaidy "Ult aqparat" Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Dashbord halyqty jumyspen qamtý, eńbek, kóshi-qon jáne áleýmettik qamtamasyz etý boiynsha ózekti statistikalyq derekterdi kórsetedi, olar Ulttyq statistika biýrosynyń, QR Eńbek jáne áleýmettik qorǵaý ministrliginiń aqparattyq júieleriniń, sondai-aq Elektrondy eńbek birjasynyń derekteri negizinde únemi jańartylyp otyrady.
Dashbordty iske qosýdyń negizgi maqsaty ashyqtyqty arttyrý, eńbek naryǵy men áleýmettik sala týraly biregei aqparatqa qol jetkizýdi jeńildetý bolyp tabylady.
«Memleket basshysy Qasym-Jomart Toqaev Qazaqstan halqyna Joldaýynda: «Aqparattyń ashyqtyǵy azamattardyń keń aýqymyn memlekettik saiasat sharalaryn iske asyrý protsesine tartýdyń kepili bolyp tabylady», - dep atap ótken bolatyn. Ashyqtyq pen qoǵamǵa esep berýdi qamtamasyz etý – bul memlekettik organdar men kvazimemlekettik sektor qyzmetindegi basymdyq. Osyǵan bailanysty, Eńbek jáne áleýmettik qamtamasyz etý naryǵy týraly aqparattyń bastapqy kózi retinde ERDO áleýmettik-eńbek salasy boiynsha ózekti jáne naqty aqparatty qamtamasyz etýdi óz aldyna mindet qoiady», - deidi Eńbek resýrstaryn damytý ortalyǵy basshysy Dáýlet Arǵyndyqov.
Panelde statistika kórsetkishteri ǵana emes, aldyńǵy kezeńmen salystyrǵanda olardyń dinamikasy da kórsetiledi. Sondai-aq, paidalanýshylarǵa derekterdi odan ári paidalaný úshin sońǵy 5 jyldaǵy dinamikamen biriktire júkteý múmkindigi beriledi.
«Sapaly jáne senimdi derekter zertteý júrgizý, gipotezany rastaý, sheshim qabyldaý protsesi, elimizdegi qazirgi jaǵdaidy baǵalaýǵa negiz bolady. Aqparatqa shekteýli qoljetimdilik buǵan kedergi keltirýi múmkin. Sondyqtan biz saitymyzda BAQ, sarapshylar qaýymdastyǵy jáne qarapaiym azamattar úshin yńǵaily aqparat kózi bolýy tiis dashbord qurdyq. Biz odan ári onyń «paidalanýǵa jaramdylyǵyn» qamtamasyz etý úshin paidalanýshylardyń qajettilikterine qarai qarqyndy jumys isteýdi jáne jetildirýdi jalǵastyramyz», – dep atap ótti ortalyqtyń Strategiia jáne jobalyq basqarý departamentiniń direktory Aleksandra Molchanovskaia.
Ortalyq sarapshy, taldaýshylardy jáne basqa da múddeli azamattardy deshbordtyń test nusqasyn jetildirýge shaqyrady. Servisti jaqsartýǵa qatysty pikir men tilekti a.molchanovskaya@enbek.kz poshtasyna jiberý kerek.
