Ótken jyly Qazaqstannyń kitap qory eki súbeli eńbekpen tolyqty.
«Orhon» baspa úiiniń muryndyq bolýymen Vetnam memleketiniń uly qairatkeri Ho Shi Minniń ómirbaiandyq týyndysy men pákistandyq zertteýshi ǵalym Ishtiaq Qusaiyn Qureshidiń «Pákistan úshin kúres» kitaby qazaq tiline aýdaryldy. Bul eki kitapty jaryq kórýine Vetnam Sotsialistik Respýblikasy men Pákistan Islam Respýblikasynyń Qazaqstandaǵy elshilikteri jan-jaqty qoldaý kórsetti.
Bul týyndylardyń basty ereksheligi – atalǵan eńbekter qazaq tiline aǵylshyn tilinen tikelei tárjimalanǵan. Sheteldik jádigerlerdiń qazaqshaǵa aýdarǵan belgili shyǵystanýshy, til mamany – Almas Másálim. Onyń aitýynsha ár kitapty aýdarýǵa shamamen toǵyz aidai ýaqyt jumsalǵan.
«Oqyrmanǵa jeńil bolý úshin, barynsha jatyńqy etip aýdardyq. Ho Shi Min týraly kitapta qazaqsha mátin men aǵylshynsha mátin qatar berilgen. Ekeýin salystyryp oqýǵa múmkindik bar. Sondai-aq Vetnam ult-azattyq qozǵalysy kóshbasshysynyń ár jyldary túsken fotolary da qosa berildi. Al, «Pákistan úshin kúres» kitabynda 19-20 ǵasyrlardaǵy Ońtústik Aziia sýbkontinentinde oryn alǵan saiasi oqiǵalar, onyń ishinde musylman qaýymynyń jeke táýelsiz Pákistan memleketin qurý jolyndaǵy kúresi baiandalady», - deidi A.Másálim.
«Orhon» baspa úii osy baǵyttaǵy jumystardy ary qarai jalǵastyryp, aldaǵy jyly taǵy da birqatar halyqaralyq eńbekterdi qazaq tiline aýdarýdy josparlap otyr.
