Álemge áigili frantsýz akkordeonshysy ári kompozitory Rishar Galiano alǵash ret elordalyq teatrdyń sahnasynda óner kórsetpek. «Mýzyka merekesi» kontserti 17 maýsym kúni «Astana Operanyń» Kameralyq zalynda ótedi.
Osy kúnde elorda turǵyndary men qala qonaqtaryna álemniń úzdik akkordeonshysy dep tanylǵan mýzykanttyń ónerine tánti bolý múmkindigi týyndap otyr. Rishar Galiano bandoneon aspabyn da asqan sheberlikpen meńgergen. Oryndaýshy – aty ańyzǵa ainalǵan Astor Piatstsollanyń dosy ári shákirti, klassika, djaz jáne frantsýz shansony toǵysqan tyń mýzykalyq baǵyt – «jańa miýzettiń» negizin qalaýshy. Uzaq ta jemisti mansaby jolynda úlken suranysqa ie bolǵan 50-den astam jeke albom jazdy. Óziniń álemdik týrneleri kezinde bedeldi halyqaralyq sahnalarda úlken jetistikpen óner kórsetip, kóptegen aitýly ártister, ujymdarmen yntymaqtastyqta jumys jasady.
Rishar Galiano 4 jasynda akkordeonshy ári ustaz ákesi Liýsen Galianomen birge fortepiano men akkordeonda oinaýdy úirene bastaidy. Onyń óner salasyndaǵy ózine tán erekshelikteri birneshe ret bedeldi júldelermen eskerildi. Rishar Galiano – Frantsiianyń Óner men ádebiet ordeniniń komandory jáne «Eren eńbegi úshin» Ulttyq ordeniniń ofitseri ekendigin atap ótken jón. Osynaý joǵary marapatty oǵan Frantsiia Respýblikasynyń Prezidenti Fransýa Olland jeke ózi tabystady.
Tanymal ártistiń shyǵarmashylyǵy klassikalyq mýzykadan bastap djazǵa deiingi barlyq baǵytty qamtidy. Qazaqstandaǵy alǵashqy óner kórsetýi aldynda Rishar Galiano elimizben jáne onyń turǵyndarymen tanysý sátin asyǵa kútetinin atap ótti.
- Men Astanada ózimniń «Klodqa arnalǵan tango», «Margo valsi», Opale Concerto men Madreperla syndy birneshe týyndylarymdy, sonymen qatar A.Piatstsollanyń kompozitsiialaryn oryndaimyn. Mýzyka jazǵan kezde kúndelikti ómirden – balalarymmen, dostarymmen, ata-anammen qaýyshyp, júzdeskennen, tabiǵattyń ásem kórinisterinen, túrli boiaýǵa qanyq shynaiy sezimderden shabyt alamyn, - dedi Rishar Galiano.
Kontsert Frantsiianyń Qazaqstandaǵy Elshiliginiń qoldaýymen ótedi. Bastalýy saǵat 13:00-de.
