Álemge esimi belgili liviialyq saiahatshy Aqtaýǵa jaiaý jetti, dep habarlaidy QazAqparat.
Búginde onyń tólqujatynda mór qoiatyn oryn joq. Sebebi, álemniń 140-tan asa elinde bolǵan. Nýridiń Qazaqstanǵa saiahaty osy jyldyń aqpan aiynda bastaldy. Osy ýaqytqa deiin ol elimizdiń soltústigi men ońtústigin aralap úlgergen. Jalpy, alǵashqy saiahatyn 1998 jyly bastady. Ondaǵy maqsaty – Liviiadan búkil álemge jáne álemnen Liviiaǵa beibitshilik, tatýlyq pen meiirimdilik jodaýyn jetkizý.
Álemdi jaiaý sharlaǵan Nýri kóktemde Reseige jetýdi josparlaǵan. Alaida, jer jahandy jailaǵan pandemiianyń saldarynan barlyq jospary keiinge qaldy. Jihankez Qazaqstanǵa kelýdi sheshken. Sóitip, úsh myńdaǵan shaqyrymdy artqa tastap, Kaspii jaǵasyna kelip jetti.
«Kaspii teńizi týraly kóp estidim. Osy ádemilikti óz kózimmen kórgim kelip, qulshynys paida boldy. Erekshe atap ótkim keletini meniń jolymda izgi nietti adamdar kóp kezdesti. Sonymen qatar eń keremet degen jerlerdi kórýime kómektesti. Adamdar: «Sizge azyq-túlik, taǵamdar kerek pe? Aqshadan qinalyp júrgen joqsyz ba? Baspana kerek pe?», - dep suraidy. Men tipti azdap salmaq qostym. Sebebi ár eldiń ózindik taǵamdaryn jeimin. Endigi kezekte balyq jeitin bolamyn», - dedi jaiaý saiahattaýshy Nýri Fýnas.
Jihankez mundai uzaq jol týraly bir minýtqa ókinbeidi. Oǵan ystyq ta, qatal klimat ta kedergi emes. Osy jyldar ishinde Nýri kez kelgen qaýipti jeńýge úirengen. Ol saiahattaý kezinde qiynshylyqtar bolǵanyn da atap ótti.
«Jabaiy janýarlar, qasqyrlar kezdesti. Alaida, men bárine úirengenmin. Osyndai oqiǵalar kezikse ózimdi qalai ustaýdy bilemin. Adamdardyń beibitshilik pen kelisimge degen senimin uialatýdy maqsat etip qoiǵan bolatynmyn. Men adamdardy dinine, násiline qarap bólmeimin. Adamzattyń bárin jaqsy kóremin», - dedi ol.
Nýri Fýnas myńdaǵan shaqyrymdy júrip ótip, óziniń erekshe missiiasyn oryndaýmen keledi. Ol beibitshilikti, adamǵa degen mahabbatyn, jaqynyna degen súiispenshilik pen meiirimdilik qatynastardy ornatýdy maqsat tutady.
Qazaqstan – Nýri Fýnastyń Aziiadaǵy sońǵy núktesi. Keiinirek ol Nur-Sultan qalasyna vizasyn uzartý maqsatymen barýdy kózdep otyr. Odan keiin Resei, Ýkrainaǵa jol tartpaq. Al búkil álem boiynsha saiahaty aiaqtalǵan soń, Nýri Fýnas Liviiaǵa oralyp, otaǵasy bolýdy armandap otyr.
