Dúisenbide Dúniejúzilik densaýlyq saqtaý assambleiasy jumysyn bastaidy jáne koronavirýs indetine bailanysty alǵash ret virtýaldy formatta ótkizedi. Kún tártibine Dúniejúzilik densaýlyq saqtaý uiymynyń (DDSU) koronavirýspen kúrestegi áreketin tekserý máselesi qoiylady degen boljam bar.
Eýropa odaǵy men Avstraliia jańa virýstyń paida bolýy men jappai taralýyn muqiiat tekserýge shaqyrdy. Bul usynysty álemniń 122 eli qoldady, arasynda Ulybritaniia men Resei de bar.
"Álemde tórt jarym million adamǵa juǵyp, 300 myńnan astam adamnyń qazasyna sebep bolǵan koronavirýs indetiniń betin qaitaratyndai jetkilikti áreket jasaldy ma" degen suraq - negizgi máselege ainalýy múmkin.
Bul usynysta infektsiia alǵash paida bolǵan Qytaidyń Ýhan qalasy naqty atalmaǵan. Alaida Pekin "saiasi shabýyl jasap otyr" dep Avstraliiany aiyptai sóilep, indetti tekserý týraly bastamaǵa birden qarsy shyqty.
Bul bastamany ázirge Vashington qoldaǵan joq. Biraq AQSh munan da qatańyraq ustanymyn baiqatyp, virýstyń shyǵý tegin Qytaidan izdeý kerek degen bolatyn. Buǵan deiin AQSh prezidenti Donald Tramp "virýs jaily aqparatty jasyrdy" dep Qytaidy birneshe ret aiyptaǵan jáne oǵan DDSU kómektesti dep sanaitynyn bildirgen. AQSh biligi virýs "Ýhan qalasyndaǵy laboratoriiadan taraýy múmkin" degen boljamdy da teriske shyǵarmaǵan. Degenmen, AQSh-tyń resmi barlaý qoǵamy qandai da bir naqty dálel jaily málimdeme jasaǵan joq. Qytai bul nusqany úzildi-kesildi teriske shyǵaryp otyr.
COVID-19 indetinen eń kóp zardap shekken el - AQSh. Sońǵy málimetterge qaraǵanda, AQSh-ta bir jarym millionǵa jýyq adam koronavirýs infektsiiasyn juqtyryp, 84 myńnan astam patsient ólgen.
