Epidemiologiialyq jaǵdaiǵa bailanysty búginde Qorǵas óńirinde burynǵy qarbalas tirshilik saiabyrsyǵan. Degenmen, «Qorǵas – Shyǵys qaqpasy» arnaiy ekonomikalyq aimaǵynda halyqaralyq qarym-qatynas múlde toqtap qalǵan joq. Saqtyq sharalary barynsha kúsheitilgen kedende jolaýshylar qatynasy toqtaǵanymen tranzittik júk tasymaldaý jumysy jalǵasýda.
Ótken jyldyń basynda tolyq qýatynda qoldanysqa berilgen «Nur joly» avtokólikterdi ótkizý beketi qyzmetkerleri alǵashqy jarty jylda 30 myńnan astam júk kóligin jáne 40 myńnan astam jolaýshylardy tasymaldaǵan 3 myńnan astam avtobýsty rásimdep, sol qyzmetinen el qorjynyna 7 milliardtan astam teńgelei qarjy ákelgen bolatyn. Jyl sońyna deiin bul úrdis eselep artyp, «Batys Eýropa – Batys Qytai» tas joly elimizdiń qarjy qoryn tolyqtyra túsken.
Búkil dúniejúzi halyqtarynyń tirshiligine tusaý salǵan juqpaly indet tabystyń taiqazanyn tasytqan halyqaralyq «Nur joly» avtokólikterdi ótkizý beketiniń jumysyn tejep tur. Jalpy kólemi 25 gektar jerdi alyp jatqan, kólikterdiń qaýipsiz kirip-shyǵýyn baqylaityn álemdik ozyq quraldarmen jabdyqtalǵan 8 jolaǵy bar bekettiń kúnine 2500 júk kóligin ótkizetin múmkindigi bar. Alaida jaǵdaiǵa bailanysty qazir keden arqyly kúnine 25-30 júk kóligi ótkizilýde. Olardyń júrgizýshileri men jolserikteri shegarashylar men kedenshilerdiń jáne epidemiolog dárigerlerdiń qatań baqylaýyna alynǵan.
Munda shegarashylar men beket qyzmetkerlerin jáne basqa da kedenge kelýshilerdiń dene qyzýy kúndelikti tekserilip, barshaǵa betperde taǵyp júrý talap etiledi. Kedennen negizinen Qytaidan nemese QHR arqyly basqa shet elderden satyp alynǵan tranzittik tehnikalar ótkizilýde. Kerisinshe, búginde «Qurǵaq portta» qarbalas tirshilik qyzyp tur. Sońǵy kezde temir jol arqyly tasylatyn halyqaralyq júk kólemi burynǵydan eselep artqany baiqalady.
Ústimizdegi jyldyń qańtar aiynan bastap «Qorǵas» shegara mańy halyqaralyq yntymaqtastyq ortalyǵy» elimizdiń san tarabynan keletin saiahatshylarǵa esigin arakidik japqan bolatyn. Al naýryz aiynyń 15 juldyzynan bastap Almaty oblysy bas sanitarlyq dárigeriniń buiryǵymen munda karantin jariialandy. Iaǵni, halyqaralyq iri saýda ortalyǵy úsh aidan beri qańyrap bos tur.
Osy sátti tiimdi paidalanǵan ortalyq ákimshiligi jolaýshylar ótkeli ǵimaratyn jóndeýden ótkizýge 70 million teńgeden astam qarjy bólip, jolaýshylar terminalyn tolyq jańalady. Ǵimarattyń kafelden tóselgen edenin toppingpen aýystyryp, burynǵy jolaýshylar jolaqtaryn bir-birinen bólip turǵan temir qorshaýlardy alyp tastap, orynyna áinekten jasalǵan ótkelder ornatty. Sonymen qatar ortalyqta júk qabyldaityn núkteler kóbeitildi. Osynyń bári aldaǵy ýaqytta «Qorǵas» shegara mańy halyqaralyq ortalyǵyna» kelýshilerge saýda-sattyq jasaýǵa qolaily jaǵdai týǵyzyp, saiahatshylardyń shegaradan ótý rásimderin jedeldetedi.
Myrzaǵali NURSEIIT,
Panfilov aýdany
Almaty oblysy
