Nursultan Nazarbaev halyqaralyq áýejaiy álemdik áýe keńistigine NQZ kodymen tirkelgenine bir jyl boldy, dep habarlaidy "Ult aqparat".
2020 jyldyń 8 maýsymynda Nursultan Nazarbaev halyqaralyq áýejaiy halyqaralyq áýe kóligi qaýymdastyǵynan (IATA) NQZ degen jańa kod alǵan bolatyn. Sodan beri áýe biletterin brondaýdyń barlyq júielerinde áýejaidyń NQZ jańa kody qoldanylyp keledi. Sondai-aq, jolaýshylar basqa áýejailardan ushyp shyqqan kezde de osy kodty biletterden, otyrǵyzý talondary men júk birkalarynan kórip júr.
Áýejaidyń jańa kodpen jumys bastaǵan sáti pandemiia kezeńimen tuspa-tus kelgen bolatyn. COVID-19 pandemiiasynyń saldarynan halyqaralyq jolaýshylar tasymaly qatty quldyrap, naryq júk jáne tranzittik reisterge basymdyq berýge májbúr boldy. Bul tásildi Nursultan Nazarbaev halyqaralyq áýejaiy da utymdy paidalanyp, qysqartýlarǵa jol bergen joq. Sonyń arqasynda barlyq óndiristik personal saqtaldy.
Ýaqyt talaby karantindik shekteýlerdiń aiasynda jolaýshylarǵa qyzmet kórsetý tájiribesin qysqa merzim ishinde jetildirip, saparlardy sapaly uiymdastyrýdy qajet etti. Áýeli teplovizorlardyń avtomatty júiesi engizilip, búkil aýmaqta áleýmettik qashyqtyqty saqtaityn belgiler ornatyldy.
«Betperde taǵý rejimi, kiretin jáne shyǵatyn jolaýshylar toptaryn bólý, halyqaralyq reisterdiń jolaýshylaryna saýalnama júrgizý, shetelden keletin meimandardan PTR-test talap etý sharalary kún saiyn jetildirilip keledi. Búginde áýejai ǵimaratyna ótý Ashyq qosymshasy arqyly júzege asyrylady. Jolaýshylar men elorda qonaqtaryna yńǵaily bolý úshin GrinLab testileý ortalyǵynda PTR jáne IFT ádisterimen COVID-19 infektsiiasyna testileýden ótý qyzmeti qoljetimdi», - dep jazady áýejaidyń baspasóz qyzmeti.
Halyqaralyq áýejaidyń resmi derekterine súiensek, jolaýshylar reisteriniń qysqarýy kásiporynnyń kirisine áser etpegen. Byltyr áýejai shaǵyn jáne orta bizneske shamamen 1 mlrd teńgeniń qoldaýyn kórsetip, biyl 1 qańtardan bastap 30 maýsymǵa deiin kommertsiialyq alańardy jalǵa alýshylardyń 650 mln teńge tólemin shegergen.
Pandemiia órship turǵan kezde shet memleketterden kelgen qaiyrymdylyq kómekter osy áýejai arqyly jetip turdy.
Ailaqtyń 2035 jylǵa deiingi damý strategiiasy boiynsha mýltimodaldyq júk tasymaly ortalyǵyn, e-commerce qyzmet kórsetý ortalyǵyn jáne erkin saýda aimaǵyn qurý josparlanýda. Jolaýshylar ainalymy men reisterdi ulǵaitý, marshrýttyq jelini keńeitý, tranzittik tasymaldardy damytý kózdelip otyr.
Áýejai Eýropalyq odaq elderiniń aýmaǵyna aviatsiialyq júk tasymaldaryn uiymdastyrýǵa múmkindik beretin RA-3 (Regulated Agents Third country) sertifikatyn alǵan. Osynyń arqasynda áýe kompaniialary aviatsiialyq qaýipsizdik boiynsha eshbir shekteýsiz Nur-Sultannan Eýroodaq elderine júk tasymaldai alady.
NQZ kodymen jumys istegen bir jyldyń ishinde áýejai 1500-den astam tranzittik jáne júk reisterine qyzmet kórsetken. Eń kóp importtalǵan taýar gúl bolsa, eń kóp eksporttalǵan taýar et bolǵan. Pandemiia kezindegi shekteýlerge qaramastan Ras-El-Haim (Scat) jáne Kýtaisi (Fly Arystan) baǵyty boiynsha jańa reister ashyldy.
Búginde áýejai aýmaǵynda qonaqúi de jumys istep tur. Servis pen qyzmet sapasyn arttyrý maqsatynda qonaq úi aýtsorsingtik qyzmet kórsetýge berildi. Qonaq úide standart, jartylai liýks jáne liýks standartty 16 jaily nómir bar.
Ushý qaýipsizdigin qamtamasyz etý úshin áýejai jyl saiyn ushý-qoný jolaǵyna jóndeý júrgizip keledi. Degenmen sońǵy 17 jyl ishinde bir de bir ret jolaqqa kúrdeli jóndeý júrgizilmegen eken.
«Qazirgi ýaqytta ushý-qoný jolaǵy men perrondy qaita jańartýǵa jobalyq-smetalyq qujattama daiyndaý josparlanyp otyr», - delingen áýejaidyń baspasóz qyzmeti taratqan resmi málimette.
