Foto: QR MAM
«Álemdi tańǵaldyrǵan qazaq ájeleri» otandyq kreativti jobasy Paris Fashion Week pen Milan Fashion Week sán aptalyqtarynda kópshilikke erekshe áser qaldyrdy, dep habarlaidy Ult.kz.
Álemdik podiýmda 60 pen 74 jas aralyǵyndaǵy 20 áje ulttyq stilde tigilgen «Aq marjan» toptamasyn tanystyrdy.
Joba qatysýshylary eldiń ár aimaǵynan arnaiy kasting arqyly irikteldi. Olar boiyndaǵy áielge tán náziktikti, senimdilik pen mádeniettilikti kórsete bildi.
«Eýropa kórermeni riza boldy! Biz saparǵa «Alasha» toptamasyn da ala baryp, Parij ben Milan kóshelerinde sony kiip serýendedik. Osylaisha kópshiliktiń nazaryn aýdaryp, sansyz jyly pikir men maqtaý sóz estidik! Osyndai joǵary deńgeide óz mádenietimizdi laiyqty túrde tanystyrǵanymyzǵa óte qýanyshtymyz. Biz kórsetkimiz kelgen basty oi – sánniń shekarasy joq ekenin dáleldeý», – deidi jobanyń avtory, tanymal sánger, Eýraziialyq dizainerler odaǵynyń múshesi jáne Ulttyq dizainerler akademiiasynyń akademigi Raýshan Ánýarbekova.
«Álemdi tańǵaldyrǵan qazaq ájeleri» jobasy Eýropadaǵy sán aptalyqtaryna tórtinshi márte qatysyp otyr. Biylǵy kórsetilim Halyqaralyq qarttar kúnine jáne Qazaqstanda atalyp ótetin Qarttar aiyna orailastyrylǵan.
