Frantsiia jumys ornynda maska taǵýdy mindetteýde, Ońtústik Koreia buqaralyq sharalarǵa qaita tyiym salýda, Avstraliiada krýizdik lainer ainalasynda daý týyndap keledi, Latyn Amerikada halyq karantin talaptaryn saqtamai otyr, – dep jazady koronavirýsqa qatysty álemdegi ahýal jóninde VVS agenttigi.
Tedros Gebreiesýs: Birge ǵana jeńe alamyz
COVID-19-ǵa qarsy vaktsina ázirleýde birneshe el nátijeli jumys kórsetýine orai Dúniejúzilik densaýlyq saqtaý uiymynyń basshysy Tedros Gebreiesýs DDU-ǵa múshe barlyq memlekettiń úkimetine hat joldap, keleshekte paida bolatyn bul vaktsinalarmen óz halqyn ǵana emes, oǵan muqtajdardyń barlyǵyn qamtamasyz etýge úndedi.
«Bizge «vaktsinalyq ultshyldyqty» doǵarý qajet. Jahandyq strategiia árbir memlekettiń ulttyq múddesine bir mezgilde jaýap beredi. Barlyǵy qaýipsiz bolmaiynsha, eshkim ózin qaýipsiz sezine almaidy», - delingen qujatta.
Frantsiia jumys ornynda maska taǵýdy mindetteýde
1 qyrkúiekten bastap Frantsiiada bir adamnan artyq otyratyn barlyq jabyq mekemelerde maskany taǵyp júrý talaby engizildi. Eńbek ministri Elizabet Bornnyń aitýynsha, el úkimeti mundai sheshimge kásipodaqtarmen keńeskennen keiin kelgen.
Ońtústik Koreia buqaralyq sharalarǵa qaita shekteý engizýde
Seýlde jáne oǵan jaqyn ornalasqan Inchhon iri portynda jabyq mekemelerde 50 adamnan kóp kez kelgen sharany ótkizýge taǵy tyiym salyndy, barlar men karaoke-klýbtar jabylyp jatyr. Koronavirýsty jeńdi dep eseptelgen bul elde syrqattardyń sany besinshi kún qatarynan eselep artyp keledi. Seisenbi kúni 246 adam tirkeldi. Kei jerlerde infektsiianyń taralýyna dini jinalystar da sebep boldy.
Avstraliiada krýizdik lainer ainalasynda daý-damai týyndap keledi
Bortynda COVID-19-ǵa shaldyqqan naýqas bolǵan «Rýbi printsess» krýizdik laineriniń 2650-ge jýyq jolaýshysyna 19 naýryz kúni Sidneide jaǵalaýǵa túsýge jáne úilerine oralýǵa ruqsat berilgen bolatyn. Alaida, jolaýshylardyń eshqaisysyna koronavirýsqa test jasalmaǵan. Keiinnen olardyń 1 myńǵa jýyǵy infektsiiamen aýyryp, 28-i qaitys boldy. Senattyq tekseris anyqtaǵandai, bul Jańa Ońtústik Ýels shtatynyń aýyl sharýashylyǵy, sý resýrstary jáne qorshaǵan orta departamenti, densaýlyq saqtaý basqarmasy jáne shekara qyzmeti sheneýnikteriniń qateligi jáne kelisilmegen is-qimylynyń saldary boldy.
Britaniia depressiiaǵa tústi
Ulttyq statistika biýrosy 500 myń adamnyń arasynda ótkizgen saýalnama málimetine sáikes, pandemiia kezinde depressiia belgisi paida bolǵan britandyqtardyń sany eki ese artyp, 20 paiyzǵa jýyqtaǵan. Adamdar uiqy men tábettiń buzylýyna, ómirge qyzyǵýshylyqtyń joǵalǵanyna jáne enjarlyqqa shaǵymdanǵan. Suraqtarǵa jaýap bergenderdiń tek 3,5 paiyzy ǵana sońǵy ailarda kóńil-kúileri joǵarylaǵanyn atap ótken. Pandemiia ásirese, jasy 40-tan tómen adamdarǵa, áielderge, kedeiler men syrqattarǵa aýyr áser etýde. Nottingem ýniversitetiniń psihiatriia professory Charli Beikerdiń sózinshe, halyqtyń kóńil-kúiin meditsinalyq diagnoz retinde emes, ainaladaǵy jaǵdaiǵa qalypty áser dep baǵalaýǵa bolady.
Latyn Amerika turǵyndary karantin talaptaryn saqtaýǵa qulyqsyz
Býenos-Aires jáne Argentinanyń ózge qalalarynyń myńdaǵan turǵyny áleýmettik qashyqtyqqa qatysty óz kózqarasyn tanytý maqsatynda dúisenbi kúni sherýge shyqty. Argentina astanasynda shekteýler 20 naýryzda engizilgen jáne minimým 30 tamyzǵa deiin kúshinde bolady. Argentinada koronavirýsqa shaldyqqandar sany 300 myńǵa jýyqtady. Olardyń 90 paiyzy el astanasynda anyqtalǵan. «Búgingi kúni eń jalǵyz dárý – qozǵalysty barynsha shekteý jáne adamdardyń qarym-qatynasty toqtatýy», - dedi prezident Alberto Fernandes. Degenmen, kórshi Braziliiada koronavirýsqa shaldyqqandar sany 12 esege kóp jáne 100 myńnan astam adam qaitys boldy. A.Fernandestiń áriptesi Jair Bolsanarý koronavirýsqa «qarapaiy tumaý» retinde qaraitynyn aityp keledi. Braziliia vitse-prezidenti Amilton Moýran VVS-ge bergen suhbatynda elde shekteý sharalaryn engizý nátije bermeitinin atap ótti. Sebebi «braziliialyqtar tártip ustanatyndardyń qataryna jatpaidy».
Ózge elderde...
Fýtboldan Frantsiia chempionatynyń «Olimpik» jáne «Sent-Eten» arasyndaǵy Alǵashqy matchy 21 tamyzdan 16 jáne 17 qyrkúiekke aýystyryldy. Sebebi marseldik klýbtyń 4 oiynshysynan koronavirýs anyqtalǵan.
Ispaniiada COVID-19-dyń qaita órshýi týrizm salasyn jandandyrýǵa kedergi bolmaq. Dúisenbi kúni bul elde indettiń 1833 jańa jaǵdaiy tirkeldi. Bul, bir ai burynǵy kórsetkishten 3 eseden astamǵa kóp. Karantindik shekteýler alynyp tastalǵan 1 shildeden bastap eń kóp tirkelgen naýqastar sany juma kúni boldy – 2987.
Gretsiia jeltoqsan aiynda eýropalyq odaq bólgen kvota boiynsha koronavirýsqa qarsy 3 mln doza vaktsina alady. Oksford ýniversiteti jáne AstraZeneca farmatsevtikalyq kompaniiasy ázirlegen vaktsinany synaqtan ótkizý qarasha aiynda aiaqtalýy tiis.
Al Finliandiia premer-ministri Sanna Marin jeńil respiratorlyq simptomdarǵa bailanysty ózin-ózi oqshaýlap, koronavirýsqa test tapsyrdy. Bul, onyń sońǵy ýaqytta tapsyrǵan tórtinshi testi.
