Avstriia epidemiialyq jaǵdaidyń nasharlaýy saldarynan 6 jeltoqsanǵa deiin jalǵasatyn jappai lokdaýnǵa ótip jatyr, dep habarlaidy "Ult aqparat" euronews.com saityna silteme jasap.
Osy ýaqytqa deiin Avstriiada iri dúkender jumys istemeidi. Mektep oqýshylary qashyqtan bilim alady. Alpi respýblikasynyń kantsleri Sebastian Kýrts el biliginiń muǵalimderge infektsiiaǵa analizdi erikti túrde tapsyrýdy usynyp, turǵyndardyń ózge de toptaryn Rojdestvoǵa deiin testileý úshin jaǵdai jasaýǵa nietti ekenin habarlady.
Germaniiada qarashanyń basynda engizilgen jarym-jartylai karantin nátijeleri baǵalanýda. GFR kantsleri Angela Merkel bul sharalardyń aýrýǵa shaldyqqandardyń eksponentsialdyq ósimin toqtatýǵa múmkindik bergenin aitty. Alaida úkimet basshysy el azamattaryn pandemiiaǵa bailanysty áleýmettik bailanystaryn odan da qatty shekteýge shaqyrdy. 16 federaldyq jerdiń basshysylarymen tolyqqandy tyiym salý máselesin kelisý múmkin bolmady.
Kovidtiń birinshi tolqyny kezinde qatań shekteý engizýden bas tartqan Shvetsiia biligi endi baǵytyn ózgertip otyr. 24 qarashadan bastap elde segiz adamnan kóp jinalýǵa tyiym salynady. 20 qarashadan bastap barlar, meiramhanalar men túngi klýbtarda saǵat 22-den bastap alkogol ónimderin satýǵa tyiym salynady. Sońǵy aptalarda elde COVID-19 virýsyn juqtyrǵandar sanynyń ósimi baiqalyp otyr, osyǵan bailanysty densaýlyq saqtaý júiesine úlken salmaq túsken.
Shveitsariiadaǵy Jeneva kantony qarashada koronavirýs juqtyrýdyń eń joǵary deńgeii belgilengen Eýropa aimaqtarynyń qataryna kirdi. Mundaǵy júz myń turǵynnyń ishinde alty myń adam aýrý juqtyrǵan. Jergilikti aýrýhanalardyń dárigerleri dabyl qaqty. Jaǵdai qatań karantin engizilgen soń (kantonda meiramhanalar men barlardan basqa, azyq-túlik satpaityn barlyq dúkender jabyldy) turaqtala bastady, alaida áli de kúrdeli bolyp qalyp otyr.
VVS-diń habarlaýynsha, Iranda Covid-19 virýsy saldarynan ólim oqiǵalarynyń kóbeiýine bailanysty senbiden bastap birinshi lokdaýn engizilip jatyr. Boljam boiynsha, táýlik ishinde ólim sany eki ese ósip, aýrýhanalar naýqastar aǵynyn qabyldai almai qalady.
«Úkimettiń bul qiratýshy virýspen kúres júrgizý úshin lokdaýn engizýden basqa amaly joq. Men koronavirýstyń úshinshi tolqynymen kúres júrgizý úshin jappai kúsh jumyldyrýdy jariialaimyn», - dedi el prezidenti Hasan Roýhani.
Pandemiia bastalǵaly, elde aýrý juqtyrýdyń 558 myńnan astam oqiǵasy tirkelip, 41,4 myńnan astam adam qaitys bolǵan.
AQSh-ta Covid-19 virýsyna shaldyqqandar sany pandemiia basynan beri 11 mln adamnan asty, al aýrýhanalardaǵy patsientter sany rekordtyq qarqynmen ósip jatyr. Elde koronavirýstan 250 myńǵa jýyq adam qaitys boldy. Michigan jáne Vashington shtattary qatań karantin sharalaryn engizgen. Sársenbiden bastap Michiganda joǵary synyp oqýshylary men kolledj stýdentteri onlain-oqytýǵa aýysyp, meiramhanalar kelýshilerdi qabyldamaidy.
Vashingtonda sportzaldar, kinoteatrlar, teatrlar jáne murajailar jabylady. Osy arada Aq úi jeltoqsannan bastap aiyna 20 mln amerikandyq azamatqa vaktsina egýge nietti ekenin málimdedi. Qazirgi kezde elde birde bir vaktsina resmi túrde maquldanǵan joq, dep habarlaidy VVS.
Avstraliiada karantin talaptaryn saqtaýǵa mindetti adamdar turyp jatqan qonaqúidiń qyzmetkeri otbasynyń 13 múshesine virýs juqtyrǵan. Aýrý juqtyrý oqiǵalary anyqtalǵan soń Ońtústik Avstraliia shtatynyń biligi ótkizilip jatqan test sanyn kóbeitip, jańa shekteýler engizdi. Naýryz aiynan bastap sheteldikterge elge kirýge tyiym salynǵan, biraq Avstraliia azamattary men qolynda turýǵa yqtiiarhaty bar azamattar arnaiy qonaqúide mindetti 14 kúndik karantinde bolý talabyn saqtasa, elge qaityp kele alady.
