Ulttyq banktiń basqarma tóraǵasy Ǵalymjan Pirmatov álemde bidaidyń qymbattaý sebepterin atady, dep habarlaidy QazAqparat agenttigi.
«Azyq-túliktiń álemdik baǵasy arzandaýda. FAO indeksi qyrkúiekte 1,1%-ǵa tómendedi. Oǵan sebep bolǵan ósimdik mailary baǵasynyń tómendeýi. Biraq astyq baǵasy qymbattap jatyr. Bidai baǵasynyń kóterilýi Ýkrainanyń Qara teńiz porttarynan astyqty jiberý múmkindigine jáne Argentina men AQSh-taǵy aýa raiy jaǵdaiyna qatysty qaýip-qaterge bailanysty.
Álemdegi infliatsiia áli de joǵary deńgeide. Baǵanyń eki mándi ósý qarqyny damýshy ekonomikalarda ǵana emes, birqatar damyǵan ekonomikalarda da baiqalady. Osyndai jaǵdailarda rezervtik valiýtalardy emissiialaityn jetekshi ortalyq bankter monetarlyq talaptardy qatańdatýdy jalǵastyrýda. Biz úshin bul teńgeniń aiyrbastaý baǵamyna qysymnyń kúsheiý táýekeliniń ósýin bildiredi. Bazalyq mólsherlemeni arttyrý arqyly teńgedegi aktivterdiń tartymdylyǵyn qamtamasyz etý sharalary talap etiledi», - dedi Ǵalymjan Pirmatov.
Sondai-aq ol munai baǵasyn tómendetýi múmkin faktorlarǵa toqtaldy.
«Álemdik munai naryǵynda baǵaǵa áser etetin túrli baǵyttaǵy faktorlardyń bolýy baiqalady. Baǵanyń tómendeýine suranys boiynsha boljamdardyń nasharlaýy, AQSh-taǵy qorlardyń ósýi áser etýde. Resei jáne Taiaý Shyǵystyń keibir elderinen taýar jetkizýdegi problemalar, sondai-aq OPEK+ elderindegi munai óndirýdiń jalpy kvotasynyń tómendeýi baǵanyń ósýin qoldaidy. AQSh-tyń Energetikalyq aqparat basqarmasynyń boljamy boiynsha, aǵymdaǵy jylǵy 4-toqsanda Brent baǵasy barreline ortasha eseppen 93 AQSh dollaryn jáne 2023 jyly barreline 95 AQSh dollaryn quraidy», - dedi Ulttyq bank basshysy.
