Álemde koronavirýstan qaitys bolǵandar 400 myńnan asty. 7 maýsym kúngi málimet boiynsha, virýs juqtyrǵandar 7 millionnan asqan. Latyn Amerikada áli indettiń beti qaitqan joq jáne halyq tyǵyz shoǵyrlanǵan Úndistan men Indoneziiada naýqas sany kóbeigen.
Koronavirýs oshaǵy damýshy elderge qarai oiysyp jatyr, al Shyǵys Aziia jáne Eýropada COVID-19-ben bailanysty adam óliminiń azaiǵany baiqalady. Eýropanyń kóptegen memleketteri ekonomikany damytýdy qolǵa alyp, shekaralaryn birtindep ashýǵa talpynyp jatyr.
6 maýsymda Úndistanda bir kúnde naýqastar sany buryn-sońdy bolmaǵan kórsetkishke jetti. Elde barlyǵy 236 myń adamǵa virýs juqqan. Úndistanda negizinen virýs taraý qaýpi joǵary aýmaqta karantin engizilgen, dúisenbi kúni elde saýda oryndary, dini nysandar ashylady dep aitylady.
Indoneziiada bir kúnde myń shaqty adamnan koronavirýs tabyldy. Bul epidemiia bastalǵaly bergi rekordtyq kórsetkish. 270 mln turǵyny bar aral memlekette barlyǵy 30 myńnan astam adamnan koronavirýs tabylǵan. 1801 adam qaitys bolǵan.
AQSh-ta COVID-19-dan 109 myńnan astam adam qaitys bolǵan. 1,9 mln-nan astam adamǵa virýs juqqan. Densaýlyq saqtaý salasy mamandarynyń aitýynsha, elde indet eki faktorǵa bailanysty basylmai otyr: kásiporyndardyń jumys istei bastaýy jáne násilshildikke qarsy jappai narazylyq, politsiianyń qyzmet ókiletin asyra paidalanýy.
