Álemde infliatsiia jedeldei túsýde. Bul týraly búgin Úkimet otyrysynda QR Ulttyq bank tóraǵasy Erbolat Dosaev aitty, dep habarlaidy "Ult aqparat".
«Yntalandyrýshy fiskaldyq jáne monetarlyq sharalar nátijesinde álemdegi infliatsiia men infliatsiialyq kútýler jedeldei túsýde. AQSh-ta infliatsiia biylǵy jylǵy qańtarda 1,4 paiyzǵa jetip, 2020 jylǵy maýsymnan bastap birtindep ósýde. Sonymen birge, Eýroodaqta 2021 jyldyń basynda baǵanyń kúrt ósýi baiqalady. Nátijesinde infliatsiia ótken jylǵy jeltoqsandaǵy 0,2 paiyzdan biylǵy qańtarda 1,2 paiyzǵa deiin ósti», - dedi 2021 jyldyń qańtar-aqpanynda eldiń áleýmettik-ekonomikalyq damýy jaiynda baiandaǵan Erbolat Dosaev.
Osy rette Ulttyq bank tóraǵasy álem derjavalarynyń ortalyq bankteri qazirgi ýaqytta eńbek naryǵynyń jai-kúiin eskere otyryp, yntalandyrýshy saiasat baǵytyn rastai bastaǵandyǵyn aitady.
«Mundai jaǵdaida Qazaqstannyń negizgi saýda áriptesterin qosa alǵanda, damýshy elderdegi ortalyq bankter damyǵan elderdegi aqsha-kredit saiasatyn erte qalypqa keltirý jáne infliatsiialyq táýekelderdiń ósý múmkindigin eskere otyryp, beitarap aqsha-kredit saiasatyna yqtimal kóshýge daiyndala bastaýda. Osy jylǵy aqpanda Reseidegi infliatsiia 4 paiyzdyq target kezinde 5,7 paiyzǵa jetti», - dedi ol.
