Álemde bolyp jatqan janjaldar saiasi dialog arqyly ǵana sheshilýi tiis. Bul týraly búgin Qytaidyń Tsindao qalasynda Shanhai yntymaqtastyq uiymyna múshe memleketter basshylarynyń keńeitilgen quramdaǵy otyrysynda Elbasy Nursultan Nazarbaev aitty, dep habarlaidy QazAqparat tilshisi.
«Aziia, Afrika, Taiaý Shyǵys jáne ózge de «Janjal núktesindegi» qaqtyǵystardy tek saiasi jolmen ǵana retteý qajettigi týraly múltiksiz ustanymdamyz. Qazaqstan Aýǵanstannyń ekonomikalyq turaqtylyǵy men qaýipsiz damýyna múddeli. Bul turǵyda kóptegen jyldar boiy Kabýlǵa qarjylai járdem kórsetip kelemiz. Astanada siriiaaralyq kelissózderdi qabyldaýshy tarap retinde Qazaqstan Siriiadaǵy protsesterdiń rettelýin jiti qadaǵalap otyr. Qysqa ǵana ýaqyttyń ishinde Resei, Túrkiia jáne Irannyń belsendi qoldaýymen Astana kelissózder protsesi ózin Siriiadaǵy jalpyqamtymdy beibitshilikke qol jetkizý jolyndaǵy tiimdi qural retinde kórsete bildi», - dedi Nursultan Nazarbaev.
Elbasy Qazaqstan Korei túbeginiń iadrosyz óńir mártebesine qol jetkizýi tek qana beibit jolmen júrý tiistigin jaqtaityndyǵyn basa aitty. Sonymen qatar Irannyń iadrolyq baǵdarlamasy boiynsha kelisimge kelýge de elimizdiń qomaqty úles qosqanyn atap ótti.
«Sondyqtan da biz is-qimyldyń birlesken jalpyqamtymdy josparynyń odan ary múltiksiz oryndalýynyń saqtalýyn túbegeili ustanamyz», - dedi Qazaqstan Prezidenti.
Sonymen qatar Memleket basshysy elimiz uiymnyń barlyq memleketterimen senimdi, dostyq pen tatý kórshilikti nyǵaitýǵa umtylatynyn, ShYU hartiiasy ustanymdaryn nyq qoldaityndyǵyn basa aitty.
Elbasynyń paiymynsha, osy jyldardyń ishinde Shanhai rýhy ShYU-nyń tiimdi qyzmetiniń biregei kózine ainalyp keldi.
«QHR-diń tabysty tóraǵalyǵy bul irgeli faktordy odan ary nyǵaita tústi. Uiymymyz barlyq halyqtarymyz ben memleketterimizdiń igiligi úshin odan ary nyǵaia túsedi dep úmit artamyz. Sóz sońynda Qyrǵyzstanǵa da bolashaqtaǵy tóraǵalyǵy barysynda osynaý laýazymda dál osyndai jemisti jumystar tileimin», - dedi Nursultan Ábishuly.
Munan bólek, otyrysta QR Prezidenti ShYU-nyń strategiialyq basymdyǵyn atap, jańa tehnologiialar boiynsha tájiribe almasatyn alań qurýdy usyndy.
Aita keteiik, otyrysqa Qazaqstan Prezidenti Nursultan Nazarbaev, Resei Prezidenti Vladimir Pýtin, Qyrǵyz Prezidenti Sooronbai Jeenbekov, Pákistan Prezidenti Mamnýn Hýsein, Tájikstan Prezidenti Emomali Rahmon, Ózbekstan Prezidenti Shavkat Mirzieev, Úndistan Premer-Ministri Narendra Modi, ShYU-ǵy baiqaýshy mártebesi bar Aýǵanstan Prezidenti Ashraf Ǵani, Belarýs Prezidenti Aleksandr Lýkashenko, Iran Prezidenti Hasan Roýhani jáne Mońǵoliia prezidenti Haltmaagiin Battýla jáne birqatar halyqaralyq uiymnyń basshylary qatysýda.
Keńeitilgen quramdaǵy otyrystan keiin sammittiń basty qujaty Tsindao deklaratsiiasy qabyldanyp, 20-dan astam qujatqa qol qoiylmaq. Onyń 17-sin Memleket basshylary rásimdeidi.
