Elordasy Astana qalasynda ótip jatqan «Ekspo-2017» Halyqaralyq mamandandyrylǵan kórmesi aiasynda M.Áýezov atyndaǵy Qazaq Memlekettik akademiialyq drama teatry 18-25 maýsym aralyǵynda óner kórsetedi.
El tarihynda qalatyn aitýly shara – «Ekspo -2017» kórmesi aiasynda kóptegen mádeni sharalar bastaý alyp, óz jalǵasyn tabýda. Solardyń biri –KSRO jáne Qazaqstannyń halyq artisi, «Qazaqstannyń Eńbek Eri» Asanáli Áshimovtiń 80 jyldyq mereitoiyna arnalǵan I Dúniejúzilik «Astana» teatr festivali. Bul festivalde Qazaqstandyq teatrlarmen qatar, alys-jaqyn shetelderden kelgen ujymdar da óner kórsetýde. Óz kezeginde Áýezov teatry repertýardan berik oryn alǵan «Beibarys Sultan» qoiylymyn álemniń túkpir-túkpirinen kelgen qonaqtardyń nazaryna usyndy. Kemeńger bileýshi, taǵdyry kúrdeli tulǵa Sultan Beibarystyń ómirinen syr shertetin qoiylymnyń avtory – Raqymjan Otarbaev bolsa, rejisseri – Iýrii Haningo-Beknazar. Adam boiyndaǵy týǵan elge, jerge degen patriottyq sezimdi oiatyp, Otanǵa degen súiispenshilikti arttyratyn qoiylymda A.Satybaldy, E.Daiyrov, B.Turys, A.Shaiahmetov syndy teatrdyń beldi akterleri óner kórsetti. Álem jurtshylyǵynyń nazaryna usynylǵan týyndy arqyly teatr artisteri óz sheberlikterin taǵy bir márte dáleldep, halyqtyń ystyq-yqylasy men zor qurmet-qoshemetine bólendi. Munyń dáleli retinde lyq tolǵan kórermen zalyn atap ótýge bolady. Rejisserlik sheshim, akterlik oiyn, mýzyka men stsenografiialyq bederleý bir-birimen úilesim tapqan qoiylym árbir kórermenniń júreginen oryn tapqany sózsiz.
Álemniń ár bóliginen kelgen teatr ujymdarymen terezelerin teń ustap, joǵary deńgeide óner kórsetken Áýezov teatry, ulttyq jaýharlarymyzǵa ainalǵan «Abai», «Qyz Jibek», «Mahabbat dastany» syndy shyǵarmalardy aldaǵy kúnderi de kórermen nazaryna usynatyn bolady.
