Rojdestvodaǵy karantin Eýropadaǵy koronavirýstyń kelesi tolqynyn boldyrmaýǵa kómektese almady, al kontinenttegi eń iri elder, sonyń ishinde Germaniia men Angliia shekteýlerdi uzartý máselesin talqylap jatyr. Osy ýaqytta Úndistan synǵa qaramastan óziniń vaktsinasyn maquldady, al katolik áleminiń kóshbasshysy Rim Papasy halyqqa úndeý jasady. Bul týraly BBS News saity habarlady.
Angliia men Shotlandiiada jańa shekteý sharalary bolýy múmkin
Ulybritaniia Eýropa boiynsha alǵashqy bolyp vaktsina egýdi bastady, biraq syrqattanýshylyq jaǵdaiy áli de órship tur, sol sebepti qosymsha shekteý sharalary engizilýi múmkin.
Premer Boris Djonson Angliiadaǵy mektepter kanikýldan keiin ashylmaýy múmkin ekenin aitty. Jaqynda úkimet buǵan deiin aitqan málimdemesine qaramastan, Londonnyń barlyq aýdanyndaǵy jáne eldiń ońtústik-shyǵys bóligindegi mektepterdiń jabylatynyn málimdedi. Bul aýmaqta epidemiologiialyq jaǵdai nasharlai túsýde. Sondai-aq, ministrler muǵalimder kásipodaqtarynyń búkil Angliiada shekteýlerdi uzartý týraly talaptaryn eskerýden bas tartty.
Birikken Koroldiktiń basqa bólikteri – Shotlandiia, Ýels jáne Soltústik Irlandiiada erejelerdi jergilikti bilik belgileidi.
Shotlandiianyń kóshbasshysy Nikola Sterdjen dúisenbide shuǵyl otyrys ótetinin aityp, «shuǵyl málimdeme» jasaýy úshin Shotlandiia parlamentinen demalystan erte oralýdy ótindi. Bilik virýstyń jańa túrine qarsy turýǵa bel býyp, jeksenbide turǵyndarǵa úiden shyqpaýǵa jáne óte qajet bolmasa kez kelgen bailanysqa túspeýge shaqyrdy.
Jalpy, Ulybritaniiada besinshi kún qatarynan kúnine 50 myńnan astam adamda virýs anyqtalýda. Vaktsina egý birneshe apta buryn bastalǵanyna jáne millionǵa jýyq adam eki ekpeniń birine qol jetkizgenine qaramastan, epidemiia azaiyp kele jatqan joq.
Ázirge olar nemis-amerikandyq BioNTech/Pfizer vaktsinasyn qabyldap jatyr, biraq dúisenbiden bastap olar otandyq Oxford/AstraZeneca vaktsinasyn ege bastaidy. Djonson aldaǵy úsh aida 66 million halqy bar Britaniianyń ondaǵan million adamyna vaktsina egiletinin aitty.
Germaniia lokdaýn merzimin uzartpaq
Germaniiadaǵy búkilhalyqtyq shektek sharalary 10 qańtarda aiaqtalýy kerek edi, biraq onyń merzimin uzartýy múmkin. Bul týraly Reiter basylymy nemis saiasatkerleriniń málimdemelerine jáne demalys kúnderi jergilikti baspasózge sholý jasai otyryp habarlady.
Kantsler Angela Merkel seisenbide aimaq basshylarymen kezdesedi. Osy máselege qatysty óziniń saqtyǵymen tanymal Merkel densaýlyq saqtaý ministri Iens Shpannyń nemisterdiń burynǵy erkin ómirine erte oralýǵa degen úmitin úzetin usynystarynan bas tartpaityny sózsiz.
«Koronavirýspen aýyrǵandardyń sany azaimai tur, sol sebepti shekteý sharalaryn áli de soza túsemiz», - deidi Iens Shpan.
Dárigerler Rojdestvo merekesinen keiin aýrýhanadaǵy tósek-orynǵa degen suranystyń qandai bolatyny kelesi aptaǵa deiin baiqalmaitynyn jáne jańa jyldyq merekelerdiń áserin biraz ýaqyt ótkennen keiin ǵana baǵalaýǵa bolatyndyǵyn aitady.
Rim Papasynyń kóńili qaldy
Rim Papasy tek ózin ǵana oilap, ózgelerge qamqorlyq tanyta almaityn adamdardan kóńili qalyp júr.
Kitaphanada videobailanys arqyly túsirilgen jeksenbi kúngi ýaǵyzynda ol Vatikan alańyndaǵy balkonnyń astynda jinalǵandarǵa, qysqy demalys kezinde shetelge qydyryp ketkenderge zekip tastady.
«Olar úide qalǵandardyń jaǵdaiy, shekteý sharalary saldarynan qarajatsyz qalǵandardyń jaǵdaiy, aýyryp qalǵandardyń jaǵdaiy týraly oilaǵan joq. Olar demalys kezinde sergip, óz kóńilderin kóterip kelýdi ǵana oilady. Bul óte ókinishti jaǵdai. 2021 jyly bizde ne kútip turǵanyn bilmeimiz, biraq qolymyzdan bir nárse keledi: bir-birimizge qamqor bola bilýimiz kerek. Ózińniń jeke basyńnyń qamyn ǵana oilaý – azǵyndyq», - deidi ol.
Úndistan ózi shyǵarǵan vaktsinany maquldady
Úndistan otandyq COVAXIN vaktsinasyn egýdi maquldady.
Bul sheshim jeksenbi kúni shyǵaryldy. Bul sheshim halyqty tań qaldyrdy, sebebi sheneýnikter Bharat Biotech vaktsinasynyń qaýipsizdigi men tiimdiligi týraly eshbir derek jariialaǵan joq jáne jalpy alǵanda kez kelgen suraqqa jaýap berýden bas tartty.
Bul áreket premer-ministr Narendra Modidi de esh qymsyntpady. Ol Úndistandaǵy ǵylym men farmatsevtika salasyn joǵary baǵalaidy.
Úndistan óziniń vaktsinasy jasalǵan jáne maquldanǵan álemdegi sanaýly elderdiń biri bolǵanyna qaramastan, júzdegen million adamǵa arnalǵan keń kólemdi vaktsina egý baǵdarlamasy eń aldymen AstraZeneca britandyq vaktsina men Oksford ýniversiteti jasaǵan vaktsinaǵa arnalǵan.
Bul baǵdarlamay bilik birneshe kún buryn maquldaǵan, sondyqtan halyq jaqyn kúnderi jetkiziletin vaktsinany kútip júr.
