Qazaqstandyq avtorlardyń álemdik shyǵarmalary BUU-nyń 6 tilinde aýdarylady. Bul týraly búgin osy týyndylardy aýdarýmen ainalysatyn shyǵarmashylyq ókilderimen ótken kezdesýde málim boldy, dep habarlaidy "Ult aqparat".
Ulybritaniia, Ispaniia, Frantsiia, Resei jáne Qytai aýdarmashylary men ádebietshileri, aýdarma jáne baspa uiymdarynyń ókilderi shyǵarmalary qazirgi qazaq ádebieti antologiiasyna engen avtorlarmen kezdesý úshin Qazaqstanǵa arnaiy saparmen keldi.
«Bul joba Qazaqstan Respýblikasy Prezidenti N.Á.Nazarbaevtyń bastamasymen júzege asyp jatqan «Rýhani jańǵyrý» baǵdarlamasy baǵyttarynyń biri. Joba táýelsizdik jyldaryndaǵy qazaq ádebieti men mádenieti, mýzykasy men beineleý ónerin, horeografiia, kino jáne teatr salasyndaǵy jetistikterdi álemge tanytýdy maqsat etedi. Sonyń ishinde, atalǵan joba aiasynda qazirgi qazaq prozasy men poeziia jinaqtaryn 6 tilge aýdarý qolǵa alyndy», - dedi Ulttyq aýdarma biýrosynyń baspasóz qyzmetinen.
Biyl aýdarmanyń kórkemdik sapasyn arttyrýǵa baǵyttalǵan birqatar arnaýly sharalar josparlanǵan. 14-qańtarda Astanada jáne 16-qańtarda Almaty qalasynda sol sharalardyń alǵashqysy sanalatyn kezdesýler ótti. Jiynda Ulybritaniia, Ispaniia, Resei, Frantsiia jáne Qytaidan kelgen aýdarmashylar men áriptes uiymdardyń ókilderi jumys barysy jaily baiandamalar jasap, avtorlarmen pikirlesti.
Buǵan deiin habarlanǵandai, qazaq ádebieti jinaqtaryn aǵylshyn tiline aýdarý, basyp shyǵarý jáne taratý jumysy Kembridj ýniversiteti baspasynyń qatysýymen iske asyp jatyr. Tanymal ýniversitet baspasy jobaǵa tájiribeli aýdarmashylar men bedeldi ádebietshi mamandardy tartqan. Britandyq áriptester «Mádeni indýktsiia» (Cultural Induction) tájiribesin qoldanýdy usyndy. Ol aýdarmashylar men redaktorlardyń túpnusqa mátin (eldiń) mádenieti men onyń mazmunyna tereń úńilýine jol ashady. Osy sapar barysynda antologiia jobasyna qatysýshy sheteldik mamandar qazaqstandyq avtorlarmen aýdarmaǵa bailanysty týyndaǵan suraqtaryn talqylap qana qoimai, Qazaqstan mádenieti, tarihy jáne qazirgi tynys - tirshiligimen jaqyn tanysady.
«Bul bizdiń jyldar boiy kútken jobamyz. Óitkeni ádebiettiń basqa tilderge aýdarylýy eki eldiń arasyna salynǵan kópir siiaqty. Ol - poeziia arqyly, proza arqyly, jalpy ádebiet arqyly ulttar arasyn jaqyndastyratyn dáneker. Búkil bir ulttyń oilaý júiesi, salt- sanasy, júregi, rýhy osy ádebiet arqyly tanylady. Sondyqtan ozyq shyǵarmalarymyzdyń álemniń tilderine aýdarylýynyń mańyzy zor», - deidi Jazýshylar odaǵynyń tóraǵasy Ulyqbek Esdáýlet.
«Ulttyq aýdarma biýrosy» qoǵamdyq qorynyń atqarýshy direktory Raýan Kenjehanuly qazaq ádebieti jinaqtaryn aýdarý jobasy qalai júrip jatqany týraly keńinen aqparat berip, sheteldik aýdarmashy mamandarmen tanystyryp ótti.
Al aqyn, QR Memlekettik syilyq iegeri Esenǵali Raýshanov: «Qazirgi qazaq ádebieti antologiialaryn ózge tilderge aýdarý jobasy der ýaqynda qolǵa alynǵan shara dep esepteimin. Sebebi, qazaq ádebieti buǵan deiin osynshalyqty deńgeide, keń kólemde nasihattalǵan joq. Alty tilge birdei aýdarý degen óte kólemdi jumys. Ásirese, ádebiettiń tiregin ustap turatyn eki janrdyń (poeziia men proza) tutas qamtylýy ol óte jaqsy dúnie. Ózge birde bir elde mundai jobalar memlekettik qarjy esebinen qarjylandyrylmaidy», - dep jobanyń mańyzyna toqtalyp ótti. Qazirgi qazaq ádebieti antologiiasyn ispan tilinde sóiletýge Ispaniia mádeniet ministrligi qoldaý kórsetip, áigili «Servantes institýty» keńesshi retinde qatysady. Jobaǵa Eýraziia jáne Ortalyq Aziia elderi ádebietin aýdarýǵa mamandanǵan tájiribesi mol aýdarmashylar tartylǵan.
Antologiianyń frantsýz tilindegi nusqasyn daiyndaýǵa Parij qalasynyń meriiasy jáne Frantsiia ulttyq kitap ortalyǵy qatyssa, orys tilinde mátin aýdarmasy men ádebi redaktsiiasy jumysyn úilestirýge Resei Jazýshylar odaǵynyń máskeýlik uiymy, al jinaqty basyp shyǵarý men taratýǵa M.Lomonosov atyndaǵy Máskeý memlekettik ýniversitetiniń baspasy atsalysady.
Qazaq ádebietiniń jinaqtaryn qytai tiline aýdarý, basyp shyǵarý jáne taratýmen Qytai Halyq Respýblikasynyń «Ulttar baspasy» ainalysady. Jinaqtardy arab álemine Egipet Arab Respýblikasynyń Mádeniet jáne bilim ortalyǵy tanystyrady.
Joǵaryda atalǵan seriktes-uiymdar aýdarma, basyp shyǵarý, taratý-nasihattaý jumystaryna 50-den asa maman tartty. Qazirgi tańda aǵylshyn, frantsýz, orys jáne ispan tilderindegi jolma-jol aýdarma jumysy aiaqtaldy. Qytai jáne arab tilderindegi jolma-jol aýdarma jumysy júrip jatyr.
Astana jáne Almaty qalalarynda ótetin kezdesýler aiasynda qazaq aqyn-jazýshylary men sheteldik mamandar qazirgi kórkem ádebietti aýdarýǵa qatysty ortaq máselelerdi talqylaidy. Avtorlar men aýdarmashylar jeke-jeke suhbat qurady. Bul aýdarmany túpnusqa mátinge meilinshe jaqyndatyp, onyń kórkemdik sapasyn qamtamasyz etpek.
Joba QR Mádeniet jáne sport ministrliginiń tapsyrysy boiynsha «Ulttyq aýdarma biýrosy» qoǵamdyq qorynyń úilestirýimen júzege asýda.
