Ál-Farabi atyndaǵy QazUÝ-dyń Filosofiia kafedrasy jáne Túrik halyqtary filosofiia qoǵamynyń Qazaq komiteti ázirlegen kóptomdyq «Túrik filosofiiasy antologiiasynyń» 1-2 tomdary jaryq kórdi.
Bul eńbek avtorlardyń «Mádeni mura» memlekettik baǵdarlamasy aiasynda júrgizgen shyǵarmashylyq izdenisteriniń zańdy jalǵasy ekenin atap ótken jón.
«Antologiiaǵa Uly dalany kóne zamannan beri mekendep kelgen túrik halyqtary men ulystarynyń filosofiialyq jáne dini-mifologiialyq dúnietanymyna qatysty mátinder men olarǵa berilgen ǵylymi taldaýlar endi. Seriiany Halyqaralyq ǵylymi keńesiniń tóraǵasy, ýniversitet rektory Janseiit Túimebaev basqaryp, tóraǵa orynbasary Bekjan Meiirbaev úilestirip, professorlar Tursyn Ǵabitov pen Jaqypbek Altaev jáne meniń qurastyrýymmen jaryqqa shyqqan «Islamǵa deiingi túrik filosofiiasy» degen 1-tomda túrik filosofiiasy haqyndaǵy diskýrstan bastap, islamǵa deiingi túrik oiynyń tarihy qamtylyp, mifologiia men nanym-senimderdiń tabiǵaty zerdelengen. Orhon jazbalaryndaǵy dúnietanymdyq baǵdarlar, táńirlik dáýir filosofiiasy, dúnieniń túrkilik sýrettemeleri týraly filosofiialyq paiymdar oi alańyna alynǵan», – deidi Filosofiia kafedrasynyń meńgerýshisi Áset Quranbek.
Ál-Farabi filosofiiasyna arnalǵan 2-tomda ál-Farabi eńbekteriniń toptamasy berilip, adamzat oishyly ómir súrgen dáýirdegi túrik órkenietiniń rýhani bolmysy baiyptalǵan. Ǵulama oishyldyń túrik mádenieti men filosofiiasyndaǵy orny men róli de baǵamdalǵan.
Qaragóz SIMÁDIL,
ál-Farabi atyndaǵy QazUÝ-diń
Baspagerlik, redaktorlyq jáne dizainerlik óner kafedrasynyń oqytýshysy
