Dúniejúzilik densaýlyq saqtaý uiymy álem elderinde medbikelerdiń jetispeýshiligine alańdaýshylyq tanytty, dep habarlaidy QazAqparat atalǵan uiymnyń Qazaqstandaǵy keńsesine silteme jasap.
«Koronavirýspen kúresimiz qoǵam úshin jáne barlyǵymyz úshin de medbike mamandyǵynyń qanshalyqty mańyzdy ekendigin taǵy bir márte kórsetip berdi. Eń qaýipti jaitpen, barynsha aýyr eńbek jaǵdaiymen betpe-bet kelgen búkil Eýropa óńirindegi jáne álem medbikeleri bul syn-tegeýirindi batyldyqpen ári kásibi biliktilikpen qarsy aldy. Olar aldyńǵy sheptegi barlyq meditsina qyzmetkerlerimen birge bizdiń tereń qurmetimiz ben alǵysymyzǵa laiyq», - dedi DDSU Eýropalyq óńirlik biýrosynyń direktory Hans Anri P.Kliýge.
Uiymnyń Qazaqstandaǵy keńsesi usynǵan derekterge sáikes, búginde álemde 28 millionǵa jýyq meditsina qyzmetiniń qyzmetkerleri bar. Al Eýropa óńirinde 7,3 mln medbike bar nemese 10 myń turǵynǵa shamamen 79 medbikeden keledi. DDSU zertteýine sáikes, medbikelerdiń shamamen 90 paiyzyn áielder quraidy jáne olardyń tek 25 paiyzy ǵana basshylyq laýazymda qyzmet etedi.
«Medbikeler - bul densaýlyǵymyzben bailanysty kóptegen problemalarymyzdy sheshý kilti. Eger myqty meditsinalyq qyzmet bolǵanyn qalasaq,onda medbikelerge investitsiia salyp, oqytýymyz kerek. Olar halyqaralyq standarttar men bilim deńgeiine sai bolýy tiis. Sonymen qatar olarǵa tiisti qural-jabdyqtarda qoljetimdi bolýy qajet. Medbikeler jumystaryna laiyqty jalaqy alyp, kásibi biliktilikterin damytýǵa da múmkindikteri bolýy kerek», - dedi Dúniejúzilik densaýlyq saqtaý uiymynyń Qazaqstandaǵy ókili Kerolain Klarinval.
