QR Densaýlyq saqtaý ministrligi vaktsinalaýdy uiymdastyrý jáne júrgizý boiynsha ádistemelik usynymdar men vaktsinalardy saqtaý jáne tasymaldaý reglamentin bekitti. Bul týraly vedomstvo basshysy Aleksei Tsoi aitty, dep habarlaidy "Ult aqparat".
«Azamattardy koronavirýs infektsiiasyna qarsy vaktsinalaýdy uiymdastyrý jáne júrgizý jónindegi is-sharalar josparyna sáikes, ministrlik barlyq sharalardy qabyldady jáne 1 aqpannan bastap COVID-19-ǵa qarsy vaktsinalaýdy bastady. Jospar sheńberinde vaktsinalaýdy uiymdastyrý jáne júrgizý jónindegi ádistemelik usynymdar jáne vaktsinalardy saqtaý men tasymaldaý reglamenti ázirlendi jáne bekitildi. Jumystar kestege sáikes júrgizilýde», - dedi Aleksei Tsoi Úkimet otyrysynda.
Ol vaktsina alǵandar týraly derekterdiń Densaýlyq saqtaý ministrliginiń aqparattyq júiesine engiziletinin atap ótti.
«Qazaqstandyq mobildik qosymshaǵa jeke immýndyq mártebesi týraly QR-kodtardy engizý úshin Egovmobile mobildik qosymshasyn iske qosý josparlanǵan, ol «Ashyq» meditsinalyq qosymshasymen integratsiialanatyn bolady. Onda meditsinalyq aqparattyq júielerdegi azamattar boiynsha, onyń ishinde QR-kod arqyly tekserýge usyný úshin COVID-19 qarsy vaktsinalaýdan ótkeni týraly derekter jinaqtalady», - dedi ministr.
Aita keteiik, 1 aqpanda Qazaqstanda koronavirýs infektsiiasyn juqtyrý jáne taratý táýekeli joǵary sanattardy koronavirýsqa qarsy vaktsinalaý bastaldy.
