Ortalyq kommýnikatsiialar qyzmetinde ótken brifingide QR Densaýlyq saqtaý ministri Aleksei Tsoi koronavirýsqa qarsy vaktsinany ne sebepti áli qabyldamai júrgeni týraly aitty, dep habarlaidy QazAqparat.
«Men ázirge reiseilik vaktsinany da, qazaqstandyq vaktsinany da qabyldaǵan joqpyn. Biz qazir sońǵy qorytyndyny kútip otyrmyz. Vaktsina Qazaqstanda tirkelip, kóptep shyǵarylǵannan keiin men de aldyńǵy qatardaǵylardyń biri bolyp vaktsina qabyldaimyn. Eshqandai burmalaý bolmasy úshin ministrliktegi áriptesterim de vaktsina qabyldaidy, onyń bir bóligi reseilik vaktsinany qabyldasa, endi bir bóligi qazaqstandyq vaktsinany qabyldaidy. Bul eki eldiń vaktsinasy da qaýipsiz ári tiimdi ekenin kórsetý úshin kerek. Aldymen osy vaktsinalardyń qaýipsizdigi men tiimdiligin dáleldeitin qorytyndyny kútip otyrmyz, odan keiin qabyldai berýge daiynbyz. Buǵan qatysty eshqandai másele joq», - deidi QR Densaýlyq saqtaý ministri Aleksei Tsoi.
Sondai-aq, ol QR Prezidentiniń kómekshisi Erlan Qarinniń, Jambyl oblysynyń ákimi Berdibek Saparbaevtyń, QR Bilim jáne ǵylym ministri Ashat Aimaǵambetovtyń koronavirýsqa qarsy vaktsina qabyldaýyna qatysty pikir bildirdi.
«Áriptesterimiz vaktsina qabyldap jatqany óte jaqsy, biraq Densaýlyq saqtaý ministriniń vaktsina qabyldaýy – vaktsinanyń 100% qaýipsiz ekenine kepildik berýi jáne búkil halyqty vaktsina qabyldaýǵa shaqyrýy bolyp sanalady. Bul úlken jaýapkershilik, sol sebepti biz qorytyndyny kútip otyrmyz. Meditsina salasynyń qyzmetkerleri retinde, densaýlyq saqtaý salasynyń sarapshylary retinde vaktsinanyń qaýipsiz ári tiimdi ekenine kepildik beretin qorytyndyny alýymyz kerek. Bizdiń mindet – barlyq qajetti qorytyndyny alǵannan keiin baryp vaktsina qabyldaý. Biz solai isteimiz jáne kórsetemiz», - deidi ol.
