QR Densaýlyq saqtaý ministri Aleksei Tsoi tynys alý analizatory kómegimen koronavirýsty anyqtaýǵa arnalǵan jańa testileýge qatysty aqparatqa orai pikir bildirdi, dep habarlaidy "Ult aqparat".
Aita keteiik, birqatar aqparat quraly Helsinkide (Deep Sensing Algorithms kompaniiasy) tynys alý analizatorynyń kómegimen COVID-19-dy testileýge daiyndyq júrgizilip jatqanyn, test nátijesi nebári 2 minýttyń ishinde daiyn bolatynyn jazǵan edi. Atalǵan habarlamaǵa sáikes, mundai qurylǵy Qazaqstan, Niderland jáne AQSh-ta synaqtan ótedi-mis.
Búgin Ortalyq kommýnikatsiialar qyzmetindegi brifing barysynda elimizdiń Densaýlyq saqtaý ministri Aleksei Tsoi dál osy aqparatqa qatysty pikirin bólisti.
«Qazirgi ýaqytta bizge búkil álemnen testileýdiń túrli ádisteri, onyń ishinde ózderińiz atap ótken jańaǵy ádis te túsip jatyr. Iaǵni, testileýdiń atalǵan túrin ázirlegen kompaniiadan aqparat kelip jatyr. Árine, biz olardy muqiiat qaraimyz. Qazaqstan naryǵyna atalǵan qural kelip túskennen keiin testileýdiń qanshalyqty dál ekenin, virýsty anqytaý barysyndaǵy júieli sipattamalarynyń qandai ekenin, testileýdiń dáleldengen ózge túrlerine qaraǵanda qanshalyqty dál ekendigin tekseremiz. Sodan keiin baryp qana Qazaqstanda testileýdiń jańa tehnologiiasy qoldanylatynyn aita alamyz», - dedi Aleksei Tsoi.
