Ulttyq qoǵamdyq densaýlyq saqtaý ortalyǵy filialynyń referens-zerthanasy júrgizgen zertteýlerdiń qorytyndysy boiynsha Qazaqstan Respýblikasynda «britandyq», «ońtústik afrikalyq», «braziliialyq» shtamǵa tán yqtimal mýtatsiia anyqtaldy. Bul týraly Densaýlyq saqtaý ministri Aleksei Tsoi málim etti, dep habarlaidy "Ult aqparat".
Qazaqstanda Dúniejúzilik densaýlyq saqtaý uiymymen birlesip Covid-19 shtamdaryn anyqtaityn ekspress PTR-skriningtiń jańa ádisi engizildi. Ulttyq qoǵamdyq densaýlyq saqtaý ortalyǵy filialynyń referens-zerthanasy KVI anyqtalǵan naýqastardan alynǵan zerthanalyq úlgilerdi zerdeledi.
«Zertteý qorytyndysy boiynsha Shyǵys Qazaqstan, Qostanai, Pavlodar jáne Soltústik Qazaqstan oblysynan ózge óńirlerde «britandyq», «ońtústik afrikalyq», «braziliialyq» shtamǵa tán yqtimal mýtatsiia anyqtaldy. Almaty qalasynda naýqastardan alynǵan DNK-nyń sekvenirleý nátijesi boiynsha «britandyq» jáne «ońtústik afrikalyq» shtamynyń ainalymy belgilengen», - dedi A.Tsoi.
Onyń aitýynsha, Dúniejúzilik densaýlyq saqtaý uiymynyń 2021 jylǵy 30 naýryzdaǵy derekteri boiynsha «britandyq shtamm» 125 elde, «ońtústik afrikalyq» - 75 elde, al «braziliialyq» 41 elde anyqtaldy. Koronavirýstyń jańa shtamdary men alǵashqy shtamnyń belgileri birdei – dene temperatýrasy kóteriledi, jótel jáne adam dám men iis sezbei qalady.
DDU málimetteri boiynsha virýstyń yqtimal mýtatsiiasy adamdardyń indetti juqtyrý jiiligine qarai artady.
«Jańa virýs kóp taraǵan elderdiń tájiribesine qarasaq, áleýmettik ara qashyqtyq saqtaý nátijesinde jáne densaýlyq saqtaý uiymdarynda infektsiianyń aldyn-alý jáne baqylaý sharalaryn qoldaný arqyly COVID-19 aýrýy tómendegen», - dedi ministr.
